Kecha kun.uz internet nashri sahifalarida “Eng koʻp moliyaviy foyda va zarar koʻrgan davlat ishtirokidagi korxonalar maʼlum qilindi” nomli maqola eʼlon qilindi va unda “Eng katta moliyaviy zarar bilan ishlayotgan davlat ishtirokidagi korxonalar roʻyxatida “Oʻzbekiston milliy elektr tarmoqlari” birinchi boʻldi, kompaniya 2022-yilni 4,34 trln soʻm zarar bilan yakunlagan” deya axborot berilgan.
Ilgariroq Davaktiv agentligining hisobotlariga tayanib, bu haqda Bankir telegram kanali, Davletovuz telegram kanali hamda boshqa axborot resurslari ham xabarlar eʼlon qilgan edi.
Axborot nashrlari muxlislari, qolaversa OAV hamda keng jamoatchilikda bu borada notoʻgʻri fikr shakllanmasligi uchun “Oʻzbekiston milliy elektr tarmoqlari” AJ axborot xizmati eʼtiboringizga quyidagi izohni maʼlum qiladi:
Aksiyadorlik jamiyati 2022-yilni 4,34 trln soʻm zarar bilan yakunlagan xususidagi axborot toʻgʻri boʻlib, buning oʻziga xos sabablari mavjud. Gap shundaki, Aksiyadorlik jamiyatining moliyaviy faoliyati boʻyicha asosiy daromadi — elektr energiyasini yagona xaridi va sotishidan shakllanadi. Yaʼni, hisobot boʻyicha asosiy zararni mahsulot (tovar, ish va xizmat) larni sotish hajmiga muvofiq tarzda, 2022-yildagi faoliyat yakuniga koʻra yalpi zarar 4,34 trln soʻmni tashkil etgan.
“Oʻzbekiston milliy elektr tarmoqlari” AJ zarar bilan ishlashiga asosiy sabab, Vazirlar Mahkamasi huzuridagi Idoralararo tarif komissiyasining 7-, 10- va 12-sonli bayonlari bilan tasdiqlangan tarmoq ichki tariflariga asosan, elektr energiyasini sotib olish (oʻrtacha 388,1 soʻm) va sotish (oʻrtacha 348,8 soʻm) narxlari orasidagi manfiy tafovut natijasida har bir kVt•soatdan 39,3 soʻm zarar evaziga hududiy elektr tarmoqlari korxonalariga yetkazib bergani tufayli edi. Yaʼni Aksiyadorlik jamiyati elektr energiyasini qimmat xarid qilinib, arzon sotilgani uchun zarar koʻrgan.
Misol uchun, 2023-yil 1-choragida elektr energiyasini ishlab chiqaruvchi korxonalardan jami 18,6 mlrd. kVt•soat elektr energiyasi oʻrtacha QQS bilan 426,2 soʻmdan xarid qilinib, Hududiy elektr tarmoq korxonalariga 18,8 mlrd.kVt•soat hajmda oʻrtacha 405,4 soʻmdan sotilgan, yaʼni har bir kVt•soatdan 20,8 soʻmdan zarar koʻrilgan.
Maʼlumot oʻrnida: Aksiyadorlik jamiyatining 2023-yil uchun tasdiqlangan Biznes rejasida ham joriy yildagi faoliyati zarar bilan yakunlanishi nazarda tutilgan.
319
