Energetika vazirligi huzuridagi “O‘zenergoinspeksiya” tomonidan Farg‘ona viloyati prokuraturasi va “Hududiy elektr tarmoqlari” AJ bilan hamkorlikda Farg‘ona viloyatida o‘tkazilgan nazorat tadbirlarida elektr energiyasidan noqonuniy foydalanish holatlari aniqlandi.
Xususan, Farg‘ona tumani, “Minabod” MFYda joylashgan Kardiologiya markazining elektr qurilmalaridagi elektr hisoblagich elektr energiyasini hisobga olmayotgani ma’lum bo‘ldi. Natijada 335 ming kVt⋅soat hisobga olinmagan elektr energiyasi bo‘yicha 167 mln so‘m miqdorida zarar yetkazilganligi aniqlandi.
Shuningdek, Bog‘dod tumani “Yangiobod” MFYda istiqomat qiluvchi D.R. o‘ziga tegishli suv nasosi xo‘jaligida qoidabuzarlikka yo‘l qo‘ygan. Mazkur xo‘jalik elektr qurilmalarining hisoblash uskunasida davlat muhri buzilganligi va hisoblash uskunasiga tashqi ta’sir ko‘rsatish natijasida 234 ming kVt⋅soat hisobga olinmagan elektr energiyasi bo‘yicha 105 mln so‘m miqdorida zarar yetkazilganligi aniqlandi.
Ma’lumot uchun: ushbu hajmdagi elektr energiyasi (jami 569 ming kVt⋅soat) 2 ming 800 ta xonadonning bir oylik iste’molini tashkil qiladi.
Aniqlangan holatlar yuzasidan rasmiylashtirilgan hujjatlar belgilangan tartibda huquqni muhofaza etuvchi organlarga taqdim qilindi.
Joylarda nazorat tadbirlari davom etmoqda.
500
