Bosh prokuror oʻrinbosari Sh.Aminov raisligida “Oʻzenergoinspeksiya” boshligʻi I.Nimatullayev, “Hududiy elektr tarmoqlari” AJ va “Hududgaztaʼminot” AJ Buxoro, Samarqand hamda Navoiy viloyatlarining tuman (shahar) filiallari rahbarlari, oʻrinbosarlari, metrologlari va yirik gaz hamda elektr energiyasi isteʼmolchilari ishtirokida energiya resurslaridan noqonuniy foydalanish holatlarining oldini olish, toʻlov intizomiga rioya qilish, tarmoqni “korrupsiyasiz soha”ga aylantirish yuzasidan yigʻilish oʻtkazildi.
Unda joriy yil 11-avgust kuni Davlatimiz rahbari raisligida Buxoro viloyatida oʻtkazilgan yigʻilishda aholi hamda iqtisodiyot tarmoqlarini energiya resurslari bilan barqaror taʼminlash va tizimda oʻgʻirlik hamda talon-torojliklarning oldini olish borasida bir qator topshiriqlar berilganligi toʻgʻrisida toʻxtalib oʻtildi.
Tadbirda yigʻilish qatnashchilariga yirik isteʼmolchilar va taʼminot korxonalari rahbarlari tomonidan energiya resurslarini talon-toroj qilish holatlari boʻyicha tayyorlangan videorolik namoyish etildi.
Shuningdek, Prezidentimizning 2023 yil 24-may kuni imzolangan “Yoqilgʻi-energetika sohasida davlat nazorati mexanizmlarini takomillashtirish va “raqamli energonazorat” tizimini joriy etish toʻgʻrisida"gi PF-77-sonli Farmoni ijrosi boʻyicha tushuntirish berilib, yoqilgʻi-energetika resurslaridan noqonuniy foydalanish holatlarining oldini olish hamda isteʼmolchilar tomonidan elektr energiyasi va tabiiy gazdan foydalanish qoidalariga qatʼiy rioya etilishi yuzasidan tegishli chora-tadbirlar belgilandi.
Shu bilan bir qatorda, yirik isteʼmolchilar hamda energiya taʼminoti korxonalari rahbarlari va xodimlari tomonidan energiya resurslarini talon-toroj qilish davom etayotgani tanqid ostiga olindi.
524
