Energetika vazirligi huzuridagi “Oʻzenergoinspeksiya” tomonidan huquqni muhofaza qiluvchi organlar va “Hududgaz Jizzax” gaz taʼminoti filiali bilan hamkorlikda Jizzax viloyatida oʻtkazilgan navbatdagi nazorat tadbirlarida Jizzax shahrida faoliyat yuritib kelayotgan “S.” MChJ tomonidan tabiiy gazdan noqonuniy foydalanish holati aniqlandi.
Oʻrganish davomida mazkur MChJga qarashli pigmentli boʻyoq ishlab chiqarish korxonasining shartnoma va loyiha ijro-texnik hujjatlarida koʻrsatilmagan 20 ta boʻyoq pishirish pechi tarmoqqa oʻzboshimchalik bilan ulanib, tabiiy gazdan noqonuniy foydalanilayotgani maʼlum boʻldi.
Mazkur noqonuniy holatlar natijasida davlat manfaatlariga yetkazilgan umumiy zarar miqdori 3 mlrd 840 mln soʻmni (3 mln 840 ming kub metr) tashkil etgan.
Maʼlumot uchun: ushbu hajmdagi tabiiy gaz hozirgi kunda 19 ming 200 ta xonadonning bir oylik isteʼmolini tashkil qiladi.
Qoidabuzar isteʼmolchiga nisbatan belgilangan tartibda choralar koʻrilib, tegishli hujjatlar huquqni muhofaza etuvchi organlarga taqdim qilindi.
Nazorat tadbirlari davom etmoqda.
323
