“O‘zenergosozlash” mutaxassislari tomonidan kuz-qish mavsumida aholining elektr va issiqlik energiyasiga bo‘lgan talabini qondirish hamda mavsumni betalofat o‘tkazish maqsadida tizimli chora-tadbirlar amalga oshirilmoqda.
“O‘zenergosozlash” MChJ energetika tizimida issiqlik elektr stansiyalari va markazlarida ishlab chiqarish barqarorligini ta’minlashda asosiy va yordamchi qurilmalarning o‘z maromida ishlashi uchun zaruriy sozlash ishlarini olib boradigan muhim korxonalardan sanaladi.
Jamiyat tomonidan 2023-2024-yillar kuz-qish mavsumida aholining, ijtimoiy soha obyektlari va iqtisodiyotning muhim tarmoqlari sifatli va uzluksiz elektr energiyasi bilan ta’minlanishi bo‘yicha ish rejasi ishlab chiqildi.
Unga ko‘ra, issiqlik elektr stansiyalari va markazlarini kuz-qish mavsumiga tayyorlash doirasida “O‘zenergosozlash” MChJ tomonidan jami 22 ta, shu jumladan, 7 ta energoblok, 4 ta turboagregat, 8 ta qozon agregati, 2 ta bug‘-gaz qurilmasi, 1 ta gaz-turbina qurilmasida sozlash ishlari amalga oshirilishi belgilangan edi.
Elektr stansiyalarining barqaror ishlashini ta’minlash maqsadida olib borilgan ishlar joriy yilning 1-iyul holatiga ko‘ra ortig‘i bilan bajarildi.
Hisobot davrida birgina mukammal va joriy ta’mirlash jadvaliga asosan 12 ta energoblok, 28 ta qozon agregati, 5 ta turbogenerator va 10 ta bug‘-gaz qurilmalarida sozlash ishlari olib borildi. Kuch transformatorlarida 35 ta joriy va mukammal ta’mirlash ishlari, 35-110-220-500 kV kuchlanishli 130 ta o‘chirgich (havoli, moyli, elegaz), ajratgich, o‘lchov transformatorlari, releli himoya hamda avtomatika qurilmalarida sozlash ishlari amalga oshirildi.
Energouskunalarning texnik holatini o‘rganish, ularning faoliyatidagi mavjud kamchiliklarni joyida aniqlash va bartaraf etish maqsadida 176 ta metall laboratoriya sinovidan o‘tkazildi, 112 tasi to‘liq kimyoviy tahlil qilindi. Elementlarni aniqlashga qaratilgan 1500 ta tekshiruv olib borildi. Mexanik xossalarini aniqlash uchun 1066 ta metall namunalariga ishlov berildi va sinov bajarildi. 64 ta suv, elektrolit, reagentlar, 410 ta energetik moy mahsulotlarida, 72 ta kuchlanish transformatorlarida va 720 ta transformator moyida xromatografik tahlillar o‘tkazildi.
Ma’lumki, kuz-qish mavsumida ishlab chiqarilgan elektr energiyasini yuqori kuchlanishli elektr tarmoqlariga sifatli uzatish muhim masala hisoblanadi. Shunga ko‘ra, elektr stansiyalardagi 110-500 kV ochiq taqsimlash qurilmalari (OTQ) uskunalarining texnik holatini tekshirish maqsadida kuch transformatorlarida 102 ta, tok transformatorlarida 300 ta, kuchlanish transformatorida 71 ta, o‘chirgichlarda 130 ta, ajratgichlarda 400 ta, yuqori voltli kiritgichlarda 150 ta va aloqa kondensatorlarida 100 ta ish olib borildi.
Sozlash ishlarining o‘z vaqtida va sifatli amalga oshirilishi ko‘p jihatdan xodimlar malakasiga bog‘liq. Shunga ko‘ra, korxona mutaxassislari energetika sohasida yetakchi bo‘lgan xorij kompaniyalari tajribasini o‘zlashtirishlari uchun Germaniya, Fransiya, Italiya va Rossiya kabi davlatlarda malaka oshirib qaytishmoqda.
“Issiqlik elektr stansiyalari” AJ Matbuot xizmati.
441
