Bugun, 2-sentabr kuni ijtimoiy tarmoqda e’lon qilingan material yuzasidan Energetika vazirligi Axborot xizmati quyidagilarni bildiradi:
Tabiiy gaz balansi O‘zbekiston Respublikasi Vazirlar Mahkamasining 2018-yil 12-yanvarda “Elektr energiyasi va tabiiy gazdan foydalanish tartibini takomillashtirishga doir qo‘shimcha chora-tadbirlar to‘g‘risida”gi 22-sonli qarori (2-ilova) bilan tasdiqlangan “Tabiiy gazdan foydalanish qoidalari”ga muvofiq ishlab chiqiladi va shu asosda resurslar hamda taqsimot balansi shakllantiriladi.
Bugungi kunda “Hududgazta’minot” AJning hududiy filiallari tomonidan 1 173 ta AGTKSHga 2023-yilning 8 oyida 2,5 mlrd kub metr tabiiy gaz yetkazib berilgan. Bu miqdor o‘tgan yilning mos davridagiga nisbatan 106 mln kub metr ko‘pdir.
Bundan tashqari, tabiiy gaz yetkazib berishda gaz quvurlarining gidravlik o‘tkazuvchanligidan kelib chiqqan holda hisob-kitob asosida soatlik, kunlik, oylik va yillik gaz hajmlar belgilanadi. Mazkur belgilangan gaz hajmlari esa iste’molchilar bilan tuziladigan shartnomalarda ko‘rsatib o‘tilgan bo‘lib, iste’molchilarning buyurtmasi asosida shakllantiriladi.
Shuningdek, iste’molchilar qo‘shimcha gaz hajmi xaridi yuzasidan O‘zbekiston Respublikasi Vazirlar Mahkamasining 22-sonli qarorida ko‘rsatilgan tartib bo‘yicha murojaat qilishlari mumkin. Bunda gaz ta’minoti tashkilotlari tabiiy gaz resurslari va gazni taqsimlashning tasdiqlangan balansiga muvofiq ajratilgan hajmlardan kelib chiqib, buyurtmalarni qayta ko‘rib chiqishga haqlidir.
370
