Joriy yilning shu kunigacha “Oʻzenergoinspeksiya” tomonidan huquqni muhofaza qiluvchi organlar va elektr hamda gaz taʼminoti korxonalari mutaxassislari bilan hamkorlikda oʻtkazilgan nazorat tadbirlarida 6 ming 305 holatda isteʼmolchilar tomonidan tabiiy gaz va elektr energiyasidan noqonuniy foydalanish holatlari aniqlandi.
Xususan:
308 mln 845 ming metr kub tabiiy gaz (286 mlrd 291 mln soʻm) va 197 mln 623 ming kilovatt-soat elektr energiyasi (103 mlrd 894 mln soʻm) talon-toroj qilingan. Buning natijasida davlat manfaatlariga 390 mlrd 185 mln soʻm zarar yetkazilganligi maʼlum boʻldi.
Noqonuniy foydalanish holatlarining eng koʻpi – Andijon, Samarqand, Navoiy va Toshkent viloyatlari hissasiga toʻgʻri keladi.
Inspeksiyaning Toshkent markaziy nazorat-kimyo laboratoriyasi tomonidan neft mahsulotlari boʻyicha olib borilgan sifat nazorati tadbirlari davomida xususiy avtomobillarga yoqilgʻi quyish shoxobchalarida 200 ta holatda 5 mln 225 ming litr neft mahsulotlarining sifatsizligi aniqlandi.
Qoidabuzar isteʼmolchilarga nisbatan belgilangan tartibda choralar koʻrilib, tegishli hujjatlar huquqni muhofaza qiluvchi organlarga taqdim etildi.
Inspeksiya tomonidan isteʼmolchilarga davlat xizmatlarini koʻrsatish boʻyicha jami 7 ming 700 ga yaqin obyektlarning elektr taʼminoti loyihalari ekspertizadan oʻtkazilib, 5 ming 589 ta isteʼmolchining umumiy quvvati 844,8 megavatt boʻlgan elektr qurilmalari elektr tarmoqlariga ulandi.
Shuningdek, hududiy elektr tarmoqlari korxonalariga tegishli 2 ming 352 ta obyektning elektr taʼminoti loyihalari kelishildi.
Xavfi yuqori boʻlgan obyektlarni va potensial xavfli ishlab chiqarishlarni loyihalashtirish, qurish hamda ulardan foydalanish boʻyicha faoliyatini litsenziyalash yuzasidan 246 ta xulosa berildi.
50 kVt va undan yuqori boʻlgan isteʼmolchilarning energiya resurslaridan oqilona foydalanishi yuzasidan 17 mingdan ziyod koʻrsatma berildi.
Unga koʻra, 538 ming kVar quvvatga ega boʻlgan reaktiv energiya kompensatsiya qiluvchi qurilmalar oʻrnatilishi taʼminlandi.
Ushbu amalga oshirilgan ishlar natijasida joriy yil yakuniga qadar 6 mln 786 ming kVt⋅soat elektr energiyasi iqtisod qilinishiga erishiladi.
811
