“O‘zbekenergota’mir” AJ Toshkent issiqlik markazini 2023/2024-yillar kuz qish mavsumiga hozirlamoqda.
Xabaringiz bor, 2022-yilning 13-dekabr kuni Prezidentimiz Shavkat Mirziyoyev Toshkent shahrining Uchtepa tumanida infratuzilma va ijtimoiy soha obyektlari faoliyati bilan tanishish jarayonida aniqlangan muammolarni bartaraf etish maqsadida Toshkent issiqlik markazini mavsumga puxta tayyorlash va uni modernizatsiya qilish bo‘yicha tegishli topshiriqlar bergan edi.
“Issiqlik elektr stansiyalari” AJ quyidagi vazifalarni amalga oshirish maqsadida korxonaning Shayxontohur tumanidagi “G‘arbiy” 3-son va Uchtepa tumanidagi “Chilonzor” 5-son issiqlik markazlarining har birida 2 ta qozonni rekonstruksiya qilish orqali mazut yoqishga moslashtirish loyihasini amalga oshiryapti. Unda “O‘zbeenergota’mir” AJ bosh pudratchi sifatida ishtirok etmoqda.
Ayni paytda belgilangan vazifalarni o‘z muddatida va sifatli bajarish maqsadida ishlar sutkasiga 24 soat tashkil etilgan.
Xususan, har ikkala issiqlik markazida qozon qurilmasi ish rejimidan kelib chiqib, belgilangan jadval asosida 100 foiz demontaj ishlari amalga oshirildi, hozirda montaj va izolyatsiya ishlari yakunlanmoqda.
Bundan tashqari, 2 ta har birining sig‘imi 1 000 metr kub bo‘lgan jami 4 ta mazut saqlash rezervuarini hamda mazut xo‘jaligini qurish ishlari bo‘yicha metallar keltirilib, rezervuarlarni yasash ishlari 98 foizga bajarildi.
Ma’lumki, yoqilg‘ini zahira rezervuarlariga to‘plash nasos qurilmasi orqali amalga oshiriladi. Shu bois, mazut nasoslarini o‘rnatish bo‘yicha ham chuqur qazilib, fundament quyildi. Devorlari g‘ishtdan ko‘tarildi.
Shuningdek, har ikkala issiqlik markazida qozon qurilmalari uchun mazut va tabiiy gazga moslashgan jami 64 ta komplektdan iborat gorelkalar va havo ventilyatorlari olib kelindi. Hozirda ularni o‘rnatish ishlari amalga oshirilmoqda.
Ta’kidlash joiz, joriy yilning 1 oktabriga qadar yakunlanishi ko‘zlangan loyihadan asosiy maqsad – 2023/2024-yillar kuz-qish mavsumini barqaror o‘tkazish va bu orqali iste’molchilarning issiqlik energiyasiga bo‘lgan talabini qondirishdan iborat.
“O‘zbekenergota’mir” AJ Matbuot xizmati
543
