Bugun, 7-sentyabr kuni Oʻzbekiston Respublikasi Prezidenti huzuridagi Davlat xizmatini rivojlantirish agentligi va Energetika vazirligi hamkorligida Oʻzbekiston Respublikasining yangi tahrirdagi Konstitutsiyasi mazmun-mohiyatiga bagʻishlangan oʻquv-seminar boʻlib oʻtdi.
Taʼkidlash joizki, boshqaruvda konstitutsiyaviy normalar ijrosini toʻliq taʼminlash, ularni davlat xizmatchisining har kunlik faoliyatiga tatbiq etish, pirovardida “inson qadri” tamoyili asosida xalqqa xizmat koʻrsatishning sifat darajasini oshirishga erishish maqsadida davlat fuqarolik xizmati hamda sud-huquq tizimi xodimlarining yangi konstitutsiyaviy talablarga rioya qilish borasidagi bilim va malakasini oshirish uchun 3 bosqichli dastur tashkil etilgan.
Bugungi oʻquv-seminar tajribali huquqshunos hamda siyosatshunos olimlardan iborat ekspertlar guruhi tomonidan olib borildi. Bu seminarlar dasturning birinchi bosqichi hisoblanadi.
Seminar maʼruza va ochiq suhbat shaklida oʻtkazilib, unda davlat xizmatchilariga Oʻzbekiston Respublikasining yangi tahrirdagi Konstitutsiyasi ijrosini soʻzsiz taʼminlash yuzasidan vazirlik hamda idoralarda amalga oshiriladigan birinchi navbatdagi ustuvor vazifalar, Konstitutsiyaning asosiy prinsiplari, inson va fuqaroning asosiy huquqlari, erkinliklari hamda burchlari va jamiyat hamda shaxs masalalari, Konstitutsiyada davlat hokimiyatining tashkil etilishi va saylov tizimidagi fundamental vazifalar toʻgʻrisida taqdimot namoyish qilindi.
Oʻquv-seminarda Energetika vazirligi hamda uning huzuridagi “Oʻzenergoinspeksiya”ning barcha boʻgʻindagi davlat fuqarolik xizmatchilari, shuningdek, OAV xodimlari, jamoatchilik vakillari qatnashdi.
Energetika vazirligi Axborot xizmati
422
