Joriy kuz-qish mavsumiga tayyorgarlik koʻrish ishlarining belgilangan meʼyorlarda olib borilishini taʼminlash maqsadida “Oʻzenergoinspeksiya” Sirdaryo hududiy boshqarmasi tomonidan “Sirdaryo” IESda amalga oshirilayotgan ishlar oʻrganildi.
Xususan, mavsumga tayyorgarlik yuzasidan jami 125 banddan iborat chora-tadbirlar ishlab chiqilgan boʻlib, joriy yil iyul-avgust oylarida ularning bajarilishi holati texnik koʻrikdan oʻtkazildi. Unga koʻra, aniqlangan kamchiliklar hamda hozirgi kunda bajarilayotgan texnik tadbirlar toʻliq qamrab olinib, tegishli koʻrsatmalar berildi.
Shuningdek, Sirdaryo viloyatidagi ijtimoiy soha obyektlarini kuz-qish mavsumiga tayyorlash ishlarining yakuniy jarayoni qanday olib borilayotganligi ham oʻrganildi. Oʻrganish asnosida hududdagi ayrim taʼlim muassasalarida bir qator kamchiliklar aniqlandi.
Misol uchun, Boyovut tumanidagi “Barkamol avlod” va 2-umumtaʼlim maktabi binolari koʻzdan kechirilganda, 0,4 kV bosh taqsimlash qurilmasida saqlagichlar yoʻqligi hamda ushbu qurilmalarga ogohlantirish belgilari osilmaganligi, javobgar shaxs tayinlanmaganligi, isitish qozonining moʻrkonlari yaroqsiz holdaligi, binodan tashqariga chiqarilmaganligi va manometr uskunalari oʻrnatilmagani maʼlum boʻldi.
Yuqoridagi holatlar yuzasidan “Oʻzenergoinspeksiya” Sirdaryo viloyati hududiy boshqarmasi tomonidan aniqlangan kamchiliklarni bartaraf etish borasida mutasaddi tashkilotlar masʼullariga koʻrsatmalar berilib, ularning bajarilishi nazoratga olindi.
356
