Yaponiya xalqaro hamkorlik agentligi (JICA) bilan Oʻzbekiston Respublikasi hududida energiya samaradorlik sohasida “Energiya menejerlarini tayyorlash markazini yaratish”, “Energiya sarfi nolga teng (ZEB) binoni qurish pilot loyihasi” hamda “Energiyani tejash normativ-huquqiy va meʼyoriy hujjatlarni ishlab chiqish” loyihalari boʻyicha chora-tadbirlarni amalga oshirish yuzasidan ikki tomonlama kelishuvga erishildi.
1. Energiya menejerlarini tayyorlash dasturini yaratish loyihasi doirasida energiyani tejash, yashil transformatsiya markazi va energiya menejeri dasturi ishlab chiqiladi.
Loyiha doirasida markazning umumiy dizayni, dastlabki oʻquv materiallarini tayyorlash, energiya menejeri dasturini tuzish, loyihaning spetsifikatsiyasi va taxminiy qiymati hamda energiya auditi qurilmalarining standart oʻlchovlari uchun spetsifikatsiyasini yaratish ishlari amalga oshiriladi.
2. ZEB koʻrgazmali pilot loyihasi doirasida yaponiyalik ekspertlar tomonidan Energetika vazirligi tizimidagi tashkilotlarning bino va inshootlari ekspress auditdan oʻtkaziladi hamda Oʻzbekistondagi ilk ZEB binosi tashkil qilinadi.
Loyiha doirasida ZEBni rivojlantirish uchun Yaponiyaning integratsiyalashgan tizimini joriy etish, Yaponiya tajribasi asosida Oʻzbekistonda ZEB binolarni rivojlantirish boʻyicha tegishli chora-tadbirlarni amalga oshirish hamda targʻib qilish boʻyicha qoʻllanmalar ishlab chiqiladi.
3. Energiyani tejash boʻyicha normativ-huquqiy va meʼyoriy hujjatlarni tayyorlash loyihasi doirasida esa, energiyani tejash standartlarini qayta koʻrib chiqish hamda uning mazmunini yaxshilash va samarali isitish boʻyicha chora-tadbirlar taklifini ishlab chiqish rejalashtirilgan.
412
