Bugun, 30-sentyabr kuni Energetika vazirligi tomonidan Sirdaryo viloyatida Saudiya Arabistonining “ACWA Power” kompaniyasi tomonidan barpo etilayotgan, quvvati 1500 MVt boʻlgan zamonaviy issiqlik elektr stansiyasida ommaviy axborot vositalari vakillari, jurnalist hamda blogerlar uchun press-tur tashkil qilindi.
Issiqlik elektr stansiyasi Sirdaryo viloyatining Shirin shahri va Boyovut tumanlari hududida barpo etilmoqda. Unda “Mitsubishi” (Yaponiya) kompaniyasining dunyodagi eng zamonaviy va energiya tejamkor gaz turbinalari oʻrnatilmoqda.
Mazkur elektr stansiyasining dastlabki 500 MVt quvvati oktyabr oyining birinchi dekadasida ishga tushiriladi. Joriy yakuniga qadar esa yana 500 MVt quvvat foydalanishga topshirilsa, 2024-yilning birinchi choragida IES toʻliq quvvatda ish boshlaydi.
Umumiy qiymati 1,2 mlrd AQSh dollariga teng boʻlgan ushbu loyiha Saudiya Arabistonining “ACWA Power” kompaniyasi tomonidan toʻgʻridan-toʻgʻri investitsiyalar hisobiga amalga oshirildi.
Stansiya toʻliq ishga tushirilgach, yiliga 12 mlrd kVt·soat elektr energiyasi ishlab chiqaradi. Unda eng zamonaviy, energiya tejamkor texnologiyalar oʻrnatilishi hisobiga yiliga 1,1 mlrd kub metr tabiiy gaz tejaladi.
Yana bir ahamiyatli jihati, stansiya qurilishi davomida 2000 nafargacha odam ish bilan ta‘minlangan bo‘lsa, u ishga tushganidan keyin bu yerda 120 ta yangi ish oʻrni yaratiladi.
Eslatib oʻtamiz, ushbu investitsiya loyihasi Oʻzbekiston Respublikasi Prezidentining 2020-yil 10-avgustda imzolangan “Sirdaryo viloyatida quvvati 1 500 MVt boʻlgan yangi issiqlik elektr stansiyasi qurilishini tashkil etish chora-tadbirlari toʻgʻrisida”gi PQ-4799-sonli qarori asosida amalga oshirilmoqda.
Oʻzbekiston Respublikasi
Energetika vazirligi Axborot xizmati.
683
