“Ўзбекнефтгаз” АЖ томонидан углеводород хом ашёси қазиб чиқаришнинг технологик жараёнларига, нефть ва газни қайта ишлашга, табиий газ етказилишига рақамли тизимларни тадбиқ этиш ва кенг қамровли жорий этиш мақсадида “Рақамли кон” Концепцияси ишлаб чиқилди.
Тажриба лойиҳа Андижондаги конларни рақамлаштиришдан бошланди.
“Рақамли кон” концепциясининг тажриба лойиҳалари «Андижоннефт» АЖга қарашли нефт ва газ конларида амалга оширила бошланди. Хусусан, Германиянинг “Siemens” ва АҚШнинг “Sensia” компаниялари ҳамкорлигида “Андижон” ва “Хўжаобод-Бостон” конларида ушбу лойиҳа тажриба сифатида тадбиқ этиладиган бўлди.
Жорий йилнинг 26 декабрь куни ўтказилган лойиҳа тақдимотида хорижлик ҳамкорлар томонидан “Андижоннефт”АЖ мутахассисларига конларда “Рақамли кон” концепциясини амалда қўллаш бўйича “Avoсet” дастурий платформа орқали маълумотларни чуқур таҳлил қилиш, бошқариш, ҳисобот бериш ва онлайн тарзда ишлаб чиқариш жараёнларини назорат қилиш бўйича маълумотлар берилди.
Шу билан бирга ушбу дастурий платформа орқали маьлумотларни турли хил интеграциялашувини ўз ичигаолиб, нефт қазиб олиш, қайта ишлаш ва хизмат кўрсатиш жараёнларида шаффофликни таъминлаши кўрсатилди.
Ушбу Концепцияда назарда тутилган мақсадлар нималардан иборат?
У.Назаров “O’ZLITINEFTGAZ» АЖ Бошқарув раиси:
— Концепцияда нефтни қайта ишлаш ва таҳлил қилишнинг замонавий усулларидан фойдаланган ҳолда нефт ва газ жараёнларининг сифат жиҳатидан янги даражага кўтариш кўзда тутилган. Бу эса нефт ва газ саноатининг техник-иқтисодий кўрсаткичларини оширишни таъминлайди.
Ишлаб чиқилган концептуал ечимлар нефт ва газ қазиб олишнинг барча босқичларида маҳсулотларни технологик ва тижорат ўлчаш сифатини сезиларли даражада яхшилаш, қудуқлар ва конлар ишлашининг технологик тартибларини ишончли бошқариш ва мониторинг қилишда тизимли ишларни ташкил этишга, ишлатиш кўрсаткичлари ва углеводород хом ашёсини қазиб чиқарилишининг параметрларини тезкор прогноз қилишга қаратилган.
Маълумот учун: Конларни рақамлаштириш бўйича лойиҳаларни амалга ошириш стратегиясида кенг кўламли тизимни жорий этишнинг учта асосий босқичи кўзда тутилган:
I – босқич. Конлар бўйича углеводород хом ашёсини электрон технологик ва тижорат ҳисобини ташкил қилиш.
II-босқич. Қудуқларнинг технологик ишлаш тартибларининг электрон мониторингини олиб бориш.
III-босқич. Қудуқлар ва умуман коннинг ҳолатини баҳолаш бўйича қисқа ва ўрта муддатли истиқболда углеводород қазиб олиш кўрсаткичларини олдиндан кўрсатишга кўра эксперт-таҳлилий тартибларини амалга оширишга қаратилган.
Барча жараёнлар онлайн тарзда амалга оширилиб, корпоратив маьлумотлар базасига киритиб борилади. Ушбу инновацион янгилик корхоналарда нефт ва газ саноатини янада ривожлантириш учун хизмат қилади.
1366
