2023-yil 12-oktabr kuni Oliy Majlis Qonunchilik palatasining Sanoat, qurilish va savdo masalalari qo‘mitasi hamda Ekologiya va atrof-muhitni muhofaza qilish masalalari qo‘mitasi hamkorligida eshituv o‘tkazildi.
Unda “Qayta tiklanuvchi energiya manbalaridan foydalanish to‘g‘risida”gi Qonunning ijro etilishi holati nazorat-tahlil tartibida Qashqadaryo viloyati misolida o‘rganish yakunlari yuzasidan mutasaddi vazirlik va idoralar rahbarlarining axborotlari eshitildi.
Ta’kidlanganidek, mamlakatimizda aholi va tadbirkorlik subyektlarining qayta tiklanuvchi energiya manbalaridan keng foydalanishini davlat tomonidan qo‘llab-quvvatlash, energiya samaradorligini oshirish orqali respublika hududlarida energiya taqchilligi qoplanishini ta’minlash, sohaning investitsiyaviy jozibadorligini oshirish maqsadida keng maqrovli ishlar amalga oshirilmoqda.
Sohaga oid huquqiy munosabatlarni tartibga solish maqsadida qator qonun hujjatlari qabul qilindi. Xususan, “Qayta tiklanuvchi energiya manbalaridan foydalanish to‘g‘risida”gi Qonun bilan qayta tiklanuvchi energiya manbalaridan foydalanish sohasidagi davlat siyosatining asosiy yo‘nalishlari, sohani davlat tomonidan qo‘llab-quvvatlash va rag‘batlantirish mexanizmlari belgilab berildi.
Shuningdek “O‘zbekiston – 2030” strategiyasida “Yashil iqtisodiyot”ga o‘tish, uning asosi bo‘lgan qayta tiklanuvchi energiyadan foydalanish ko‘rsatkichlarini keskin oshirish borasida ustuvor maqsad va vazifalar aks etdi.
Qo‘mitalar tomonidan Qashqadaryo viloyatida o‘tkazilgan o‘rganishlar mobaynida aholi bilan muloqot qilindi, xonadonlarga, ijtimoiy soha obyektlari hamda tadbirkorlik subyektlari bino va inshootlarida o‘rnatilgan qayta tiklanuvchi manbalari qurilmalarining holati bilan tanishildi.
Qayd etish joiz, qayta tiklanuvchi energiya manbalaridan foydalanish sohasidagi 2023 yilga mo‘ljallangan hududlar kesimidagi manzilli dasturlar doirasida Qashqadaryo viloyatida bir qator ishlar amalga oshirilgan.
Nazorat-tahlil tadbirida aniqlanishicha, Qashqadaryo viloyatida elektr energiyasi ishlab chiqarish quvvatlari kamligi, shuningdek yildan yilga iste’molning o‘rtacha 10 foizga ortib borishi oqibatida kuz-qish davrida 291 mln. kVt.soat elektr energiyasi va 45 mln. kub metr tabiiy gaz defitsiti kutilmoqda.
Viloyatdagi 733 ta ijtimoiy soha obyekti va davlat tashkilotlarida quvvati 7,4 MVt quyosh panellari, 8,3 ming litr suv isitish uchun mo‘ljallangan geliokollektorlar o‘rnatish belgilangan bo‘lib, bugungi kunda 584 ta obyektda 11,6 MVt quvvatli quyosh panellari hamda 62 ming litr suv isitish uchun mo‘ljallangan geliokollektorlar o‘rnatilgan. Shuningdek, tadbirkorlik subyektlari bino va inshootlariga o‘rnatilishi lozim bo‘lgan quvvati 38,7 MVt quyosh panellaridan, amalda 833 ta obyektda quvvati 8,7 MVt quvvatli quyosh panellari o‘rnatilgan.
Yig‘ilishda deputatlar tomonidan ko‘p qavatli uylarda va davlat idoralarida kichik quvvatli qayta tiklanuvchi energiya manbalari qurilmalarini o‘rnatish borasida belgilangan ko‘rsatkichlarni o‘z muddatida ijro etilishini ta’minlash yuzasidan fikrlar bildirildi.
Eshituvda deputatlar qayta tiklanuvchi energiya manbalaridan foydalanish sohasiga innovatsion texnologiyalar, ilmiy-texnikaviy ishlanmalarni joriy etish, investitsiyaviy jozibadorlikni oshirish bo‘yicha chora-tadbirlarni amalga oshirish, davlat-xususiy sheriklikni rivojlantirish lozimligini qayd etdilar.
Shuningdek, qayta tiklanuvchi energiya manbalaridan foydalanish sohasida kadrlarni tayyorlash, qayta tayyorlash va ularning malakasini oshirishni tashkil etish, shuningdek o‘rnatilgan quyosh panellari bo‘yicha aniq hisob-kitoblarni yuritish, ushbu uskunalarga servis xizmati ko‘rsatish, panellarni ekspluatatsiya qilish, xavfsizligini ta’minlash chora-tadbirlarini amalga oshirish bo‘yicha takliflar berildi.
Eshituvda ko‘rilgan masala yuzasidan qo‘mitalarning tegishli qarori qabul qilindi.
944
