Maʼlumki, 2023-yil 4–6-may kunlari Tojikiston Respublikasi poytaxti Dushanbe shahrida Muvofiqlashtiruvchi komissiyaning navbatdagi 41-yigʻilishi hamda Markaziy Osiyo Muvofiqlashtiruvchi elektr energetika kengashining 39-yigʻilishi boʻlib oʻtgan edi. Tadbirda Tojikistonning “Barki Tochik” kompaniyasi Kengashning mezbonlik navbati rasman Oʻzbekistonga oʻtganini bildirgandi.
2023-yil 25–26-oktyabr kunlari Samarqand shahrida Muvofiqlashtiruvchi komissiyaning navbatdagi 42-yigʻilishi hamda Markaziy Osiyo Muvofiqlashtiruvchi elektr energetika kengashining 40-yigʻilishi boʻlib oʻtadi. Unga “Oʻzbekiston milliy elektr tarmoqlari” aksiyadorlik jamiyati mezbonlik qiladi.
Xalqaro tadbirda Oʻzbekiston, Tojikiston, Qozogʻiston, Qirgʻiziston va Turkmaniston elektr energetika tashkilotlari rahbarlari hamda vakillari, shuningdek, Oʻzbekiston Respublikasi Energetika vazirligi huzuridagi “Milliy dispetcherlik markazi” davlat unitar korxonasi va “Energiya” muvofiqlashtiruvchi dispetcherlik markazi rahbarlari hamda mutaxassislari ishtirok etishadi. Rossiya Federatsiyasidan tashrif buyuruvchi mutaxassislar esa kuzatuvchi maqomida qatnashadilar.
Ishchi tartibda oʻtadigan yigʻilishda Markaziy Osiyo mintaqasida 2023/2024-yil kuz-qish mavsumiga tayyorgarlik koʻrish ishlari, bu borada amalga oshirilgan yumushlar va yoʻl qoʻyilgan kamchiliklar hamda ularning yechimlari atroflicha tahlil qilinadi.
Shuningdek, kuz-qish mavsumida Markaziy Osiyo elektr energetika halqa tizimida elektr taʼminoti barqarorligini taʼminlash uchun zarur amaliyotlar, kaskadli oʻchishlarning oldini olish, qayta tiklanuvchi energiya manbalarini elektr energetika tarmogʻiga ulash va ularni toʻgʻri ekspluatatsiya qilish, mintaqada suv resurslaridan oqilona foydalanish istiqbollari muhokama etilishi kutilmoqda.
395
