“O‘zbekenergota’mir” AJ Xitoy elektr energetika sanoatining yirik kompaniyalari bo‘lgan “State Grid”, “CNTIC” va “China XD” bilan hamkorlikda mamlakatimizda elektr energetika tarmog‘ini rivojlantirish bo‘yicha bir qator kelishuvlarga erishdi.
Jumladan, Xitoyning jahonga mashhur “State Grid” korporatsiyasi tarkibidagi “China Electric Power Equipment and Technology Co., Ltd.” kompaniyasi bilan “O‘zbekenergota’mir” AJ kelishuv doirasida yurtimizning bir qator hududlarida yuqori kuchlanishli elektr uzatish tarmoqlarini qurish va modernizatsiya qilish, yangi podstansiyalar qurib foydalanishga topshirish ishlarini hamkorlikda olib borish belgilangan. Olib boriladigan ishlar natijasida, O‘zbekistondagi yuqori kuchlanishli elektr uzatish tarmoqlari tizimiga zamonaviy, shu bilan birga raqamli texnologiyalarni joriy etish, yangi ish o‘rinlarini yaratish imkoniyati vujudga keladi.
“China National Technical Import and Export Corporation” (CNTIC) kompaniyasi bilan erishilgan kelishuvlarga ko‘ra esa, Toshkent shahri aholisi va poytaxt iqtisodiyot tarmog‘i korxonalari uchun qo‘shimcha quvvatlar yaratiladi. Poytaxtimizni elektr va issiqlik energiyasiga bo‘lgan talabini qondirish maqsadida Mirobod, Mirzo Ulug‘bek, Shayxontohur, Yunusobod, Yashnobod va Uchtepa tumanlarida yangi, zamonaviy va energosamarador kogeneratsion quvvatlar joriy etiladi.
Shuningdek, “China XD Elektric Co., Ltd.” konsernining “Xian XD” Electric Engineering Company Limited kompaniyasi “O‘zbekenergota’mir” AJ bilan yurtimizdagi elektr stansiyalarni modernizatsiya va rekonstruksiya qilish uchun import o‘rnini bosuvchi yuqori samarador va zamonaviy energo qurilmalarni mahalliy sharoitlarda ishlab chiqarish bo‘yicha kelishuvga erishildi.
Muzokaralarning yana bir muhim jihati “O‘zbekenergota’mir” AJning yosh mutaxassislari va xodimlarining malakasini va kasbiy mahoratini oshirish masalasi bo‘lib, ular xitoylik mutaxassislarni jalb qilgan holda qurilish va sozlash ishlarida ishtirok etadilar. Birgalikdagi sa’y-harakatlar orqali yoshlarimiz dunyoda tan olingan elektr qurilmalarni boshqarish va ular bilan ishlash bo‘yicha bilim va tajribalarini oshirishadi.
“O‘zbekenergota’mir” AJ matbuot xizmati
591
