Mamlakatimizdagi elektr ulgurji isteʼmolchilarining 28 foizi avtomatlashgan tizimga (АSKUE) ulanmagani qayd etildi. Yoki, aqlli hisoblagichlar oʼrnatilgani bilan, 170 mingdan ziyod abonentlarning avtomatlashgan tizim bilan aloqasi yoʼq.
Soha mutasaddilariga barcha ulgurji isteʼmolchilarni АSKUE tizimiga ulash topshirildi.
Joriy yilda hududlarda 3,5 milliard kilovatt-soat elektrdan noqonuniy foydalanish holatlari aniqlangani taʼkidlandi.
Misol uchun, Karmanadagi qurilishi yakunlanmagan binoda 452 ta “mayning” qurilmasi oʼrnatilgani oqibatida oʼn oy davomida qariyb 5,5 million kilovatt-soat elektrdan noqonuniy foydalanilgan.
Karmana tumani hokimi, prokurori, departament boshligʼi, ichki ishlar, elektr tarmoqlari rahbarlari oʼn oyda hududda shuncha elektrdan oʼgʼirlikni payqamagani, tumanda oylik isteʼmol birdaniga 5 foizga oshganini tahlil qilmagani tanqid qilindi.
Ushbu rahbarlarning barchasi ishdan olinishi belgilandi, Bosh prokuraturaga ularning harakatiga baho berib, qonun ustuvorligini taʼminlash topshirildi.
Mutasaddilarga oʼgʼirliklar eng yuqori boʼlgan hududlarda noqonuniy isteʼmolga sabab boʼlayotgan omillarni aniqlab, ularni bartaraf qilish boʼyicha tizim yaratish vazifasi qoʼyildi.
422
