Bugun, 3-noyabr kuni “Yashil energiya” MChJ qoshida Xitoyning “Huawei” kompaniyasi bilan birgalikda tashkil etilgan dispetcherlik markazi ishga tushirildi.
Ma’lumki, Prezidentimizning 2023-yil 16-fevraldagi PQ-57-son qaroriga muvofiq mas’uliyati cheklangan jamiyat shaklidagi “Yashil energiya” kompaniyasi tashkil etilgandi.
Kompaniya ijtimoiy soha obyektlari, davlat organlari va boshqa tashkilotlarning bino hamda inshootlariga kichik quvvatli qayta tiklanuvchi energiya manbalari qurilmalarini o‘rnatish va ekspluatatsiya qilish bilan shug‘ullanadi.
Belgilangan vazifalarni o‘z vaqtida, to‘liq hamda sifatli bajarish maqsadida kompaniya tomonidan bugungi kunga qadar 333 ta ijtimoiy soha obyektlari va davlat idoralarida umumiy quvvati 18,8 MVtga teng bo‘lgan quyosh fotoelektr stansiyalari foydalanishga topshirildi.
Mazkur o‘rnatilgan quyosh panellari orqali hozirgi kunga qadar 4 mln 531 ming kVt·soat elektr energiyasi ishlab chiqarildi. Buning natijasida tarmoqdan olinadigan shu miqdordagi elektr energiyasi tejalishiga erishildi.
Foydalanishga topshirilgan quyosh fotoelektr stansiyalarining ish rejimlarini doimiy nazorat qilish, yuzaga kelgan nosozliklarni o‘z vaqtida aniqlash hamda bartaraf etish, kunlik (soatlik) ishlab chiqarilgan elektr energiyasi bo‘yicha tahlillarni olib borish maqsadida “Dispetcherlik markazi” Xitoyning “Huawei” kompaniyasi bilan birgalikda tashkil etildi.
Asosiy vazifalardan biri – kompaniya tomonidan obyektlarda ishga tushirilgan dispetcherlik nazorati tizimidagi quyosh fotoelektr stansiyalarining ishlash prinsipini muvofiqlashtirish, ular orqali ishlab chiqarilgan elektr energiyasining hisobini yuritish va har bir obyekt kesimida ma’lumotlarni shakllantirish hamda elektr energiyasining uzilishi bilan bog‘liq bo‘lgan favqulodda vaziyatlarni tezda bartaraf etishdan iboratdir.
Zamonaviy dasturlar orqali kompaniyaga tegishli bo‘lgan Respublikaning istalgan nuqtasidagi obyektda o‘rnatilgan quyosh fotoelektr stansiyasining yillik, choraklik, oylik, kunlik, hattoki soatlik ishlab chiqargan elektr energiyasi miqdorini hamda shu fotoelektr stansiyasida o‘rnatilgan barcha qurilmalarning parametrlarini ko‘rib borish mumkin. Dastur orqali biron-bir qurilmada yuzaga kelgan nosozlik shu yerdan turib aniqlanadi hamda kompaniyaning tegishli xodimiga yuzaga kelgan holat bo‘yicha aniq ma’lumot berish imkoniyati yaratildi.
Kompaniya tomonidan olib borilayotgan ishlar zamirida energetika tizimiga quyosh fotoelektr stansiyalarini tatbiq etilishi orqali kunduzgi maksimum vaqtlarda elektr energiyasiga bo‘lgan ehtiyojini ta’minlashdir.
3494
