10-noyabr kuni Oliy Majlis Qonunchilik palatasi huzuridagi Yoshlar parlamentining Energetika vazirligiga biriktirilgan aʼzolari bilan uchrashuv boʻlib oʻtdi.
Unda Energetika vazirligi masʼullari, Yoshlar parlamenti aʼzolari va ommaviy axborot vositalari vakillari ishtirok etdi.
Uchrashuvda taʼkidlanganidek, Yoshlar parlamentining maqsadi yoshlarning qonuniy huquq va manfaatlarini qoʻllab-quvvatlash, ularning huquqiy ongi va savodxonligini oshirish, qonunchilik va qonun ijodkorligi jarayoniga yoshlarni jalb qilish va qabul qilinayotgan qonunlarni yoshlar orasida keng targʻib qilish orqali ularning parlament hayotiga daxldorligini oshirishda ishtirok etishdan iborat.
Tadbirda Vazirlik tomonidan yoshlarga oid davlat siyosatini amalga oshirish boʻyicha yangiliklar, “ogʻir” toifadagi yoshlar bilan olib borilayotgan ishlar, vazirlikka biriktirilgan Yoshlar parlamenti aʼzolarining asosiy ustuvor vazifalari, ular bilan hamkorlikni yoʻlga qoʻyish bosqichlari va hisobot almashinuvini yoʻlga qoʻyish hamda kelgusidagi asosiy rejalar yuzasidan fikr almashildi.
Shuningdek, vazirlik tizimida amalga oshirilayotgan ishlar haqida maʼlumot berildi. Xususan, bugungi kunda yoqilgʻi-energetika kompleksi tizimida 105 mingdan ziyod ishchi-xodim faoliyat yuritadi. Shundan 17 ming 400 nafari 30 yoshgacha boʻlgan xodimlarni tashkil etsa, 30 yoshgacha boʻlgan ayollar soni 1 ming 669 nafardan iborat. Bugungi kunda 340 nafar yosh rahbarlik lavozimida ishlamoqda. Ularning 12 nafari xotin-qizlardir.
2023-yil yakuni boʻyicha 262 nafar yosh oliy oʻquv yurtini bitirgandan keyin ishga qabul qilingan boʻlsa, 417 nafar yosh kollej va texnikumni tamomlab, ishga kirgan.
Yosh mutaxassislarning rivojlangan davlatlarda tajriba orttirishini tashkil etish maqsadida ular xorij mamlakatlariga xizmat safarlariga va taʼlim olish uchun nufuzli oliy taʼlim muassasalariga yuborilmoqda.
367
