Hurmatli kasaba uyushmalari xodimlari va faollari!
Sizlarni Oʻzbekiston kasaba uyushmalari kuni bilan chin qalbimdan samimiy tabriklab, eng ezgu niyatlarimni bildiraman.
Oʻzbekiston kasaba uyushmalari Federatsiyasining sakkizinchi Qurultoyi zarhal harflar bilan bitiladigan qator voqeliklarga boy tarzda tarixga kirdi hamda unda ilk bor Davlatimiz rahbarining delegatlarga tabrigi yoʻllandi.
Unda soʻnggi 5 yilda kasaba uyushmalari tizimida keng koʻlamli chora-tadbirlar amalga oshirilganligi, mehnat jamoalarida xodimlarni ijtimoiy-iqtisodiy qoʻllab-quvvatlash ishlari yangi bosqichga koʻtarilganligi, mamlakatimizdagi eng yirik fuqarolik instituti boʻlgan kasaba uyushmalarining oʻrni va roli oshib borayotgani alohida eʼtirof etildi.
Oʻzbekiston tarixida birinchi marotaba 11-noyabr – Oʻzbekiston kasaba uyushmalari kuni etib belgilandi.
Oʻzbekiston Respublikasi “Kasaba uyushmalari toʻgʻrisida” yangi Qonunning qabul qilinishi hamda boshqa qator nufuzli tuzilmalar bilan yaqin aloqalarning yoʻlga qoʻyilayotgani, aholining mehnat huquqlari va ijtimoiy himoyasini taʼminlashda kasaba uyushmalari Hukumatning teng huquqli hamkoriga aylanayotgani – bularning barchasi Oʻzbekiston kasaba uyushmalari faoliyati butunlay yangi bosqichga koʻtarilganidan dalolatidir.
Ayni paytda Oʻzbekiston energetika, neft-gaz hamda geologiya xodimlari kasaba uyushmasi tizimida 300 dan ortiq boshlangʻich tashkilot oʻz safida 190 ming nafardan ziyod aʼzolarni birlashtirib, ularning kasbiy, mehnatga oid, ijtimoiy-iqtisodiy, huquq va manfaatlarini taʼminlash, munosib mehnat sharoitlarini yaratish borasida ish beruvchilar bilan samarali hamkorlik olib borayotgani fikrimiz tasdigʻidir.
Davlatimiz rahbarining mehnat qonunchiligi buzilishi holatlarining oldini olish maqsadida “Har qaysi korxona yoki tashkilotda albatta kasaba uyushmasi faoliyat koʻrsatishi va rahbarlar albatta ular bilan yaqin hamkorlikda ish olib borishi shart”, deya taʼkidlagan fikrlaridan kelib chiqib, biz bu yoʻlda ijtimoiy sheriklikni yanada rivojlantirish, Tarmoq (tarif) kelishuvlari hamda jamoa shartnomalari taʼsirchanligini oshirish borasidagi faoliyatimizni izchil davom ettiramiz.
Kasaba uyushmalarining ishchi va xizmatchilar munosib mehnat sharoitlarida mehnat qilishi, ish haqi, bandlik, xodimlar hamda ularning oila aʼzolarini sogʻlomlashtirish, maʼnaviy-maʼrifiy ishlar samaradorligini oshirish, respublikamizdagi diqqatga sazovor qadamjolarga sayohatlar tashkil etish, yozgi mavsumda bolalarning oromgohlarda dam olishlarini tashkillashtirish, xalqaro hamkorlik aloqalarini mustahkamlash va taʼsirchan jamoatchilik nazoratini oʻrnatishga oid tashabbuslarini qoʻllab-quvvatlaymiz.
Sizlarni bugungi ayyom – Oʻzbekiston kasaba uyushmalari kuni bilan samimiy qutlab, barchangizga sihat-salomatlik, masʼuliyatli hamda xayrli ishlaringizda zafarlar tilayman.
Xonadonlaringizni tinchlik-xotirjamlik, fayzu baraka, baxt va omad hech qachon tark etmasin!
J.Mirzamahmudov,
Oʻzbekiston Respublikasi Energetika vaziri.
388
