Bugun, 5-dekabr kuni Energetika vazirligida “Konstitutsiya – xalqchil davlat, barqaror taraqqiyot va farovon hayot asosi!” mavzusida ma’naviy-ma’rifiy tadbir bo‘lib o‘tdi.
Unda Energetika vazirligi va tizim tashkilotlari mas’ul xodimlari qatnashdi. Adliya vazirligi hamda Toshkent davlat yuridik universitetidan taklif etilgan mas’ul xodimlar tomonidan yangi tahrirdagi O‘zbekiston Respublikasi Konstitutsiyasining mazmun-mohiyati haqida ma’ruza qilindi.
Eng avvalo, yangilangan Konstitutsiyamiz 128 moddadan 155 moddaga oshirilib, mutlaqo takomillashtirilgani alohida qayd etib o‘tildi.
So‘nggi yillarda iqtisodiy, ijtimoiy, madaniy-ma’naviy hayotning turli sohalarida amalga oshirilayotgan keng ko‘lamli islohotlar va bu borada erishilayotgan natijalarning mustahkamlanishida Konstitutsiyaning o‘rni va roli katta ekanligi ta’kidlandi.
Taqdimot materiali orqali “Konstitutsiya – xalqchil davlat, barqaror taraqqiyot va farovon hayot asosi!” degan hayotiy shiorning mohiyati hamda ahamiyati, Bosh Qonunimiz asosida inson huquq va erkinliklari sohasida mutlaqo yangi bosqichga o‘tilganligi ochib berildi.
Ma’ruzada mulkiy huquqlarning ishonchli himoyasini ta’minlash, ushbu huquqlarni cheklayotgan omillarni bartaraf etish, sog‘liqni saqlash, ilm-fan, madaniyat, san’at hamda sport sohalarini rivojlantirish, nuroniylar, xotin-qizlar va yoshlarga doimiy e’tibor hamda g‘amxo‘rlik ko‘rsatish, oila, onalik, bolalik va otalikni himoya qilish bo‘yicha amalga oshirilayotgan islohotlar mazmun-mohiyatiga alohida e’tibor qaratildi.
462
