Xitoyning yetakchi “Diplomat” nashri sahifalarida “O‘zbekistonda “yashil” energetika: quyosh va shamol elektr stansiyalarining istiqbollari” sarlavhasi ostida maqola e’lon qilindi.
Nashrda O'zbekiston qayta tiklanadigan energiya manbalaridan foydalanish bo'yicha yuqori salohiyatga ega ekanligi ta'kidlanadi. Xalqaro energetika agentligi va BMT Yevropa iqtisodiy komissiyasining hisob-kitoblariga ko'ra, respublikada qayta tiklanadigan energiya manbalarining umumiy salohiyati 2091 milliard kVt/soatni tashkil etadi.
Nashrda yozilishicha, O'zbekiston yillik 320 ga yaqin quyoshli kunga ega mamlakat sifatida quyosh energetikasini rivojlantirish bo'yicha yuqori salohiyatga ega. Shu nuqtai nazardan qaraganda, O'zbekistonning eng istiqbolli hududlari Surxondaryo, Buxoro va Qashqadaryo viloyatlari bo'lib, ularda har bir paneldagi o'rtacha ishlab chiqarish yiliga 1680-1700 kVt/soatni tashkil qiladi. Quyosh radiatsiyasining o'rtacha darajasi Qoraqalpog'iston, Sirdaryo va Toshkent viloyatlarida, eng pasti esa Farg'ona vodiysida kuzatiladi. Ayni paytda quyosh energiyasi salohiyatidan foydalanish maqsadida 1,3 milliard dollarlik 8 ta davlat-xususiy sheriklik loyihasi amalga oshirilmoqda.
Maqolada O'zbekistonning shimoli-g'arbiy va janubi-g'arbiy hududlarida shamol energiyasidan foydalanishning ham yaxshi istiqbollari mavjudligi ta'kidlangan. Ushbu yo'nalishning rivojlanishi yiliga 3,3 milliard kub metr tabiiy gazni tejash imkonini beradi. So'nggi yillarda 3,6 milliard dollarlik 7 ta loyiha amalga oshirildi.
Ta'kidlanishicha, O'zbekistonda "yashil" iqtisodiyot, xususan, "yashil" energetikani rivojlantirishga alohida e'tibor qaratilmoqda. Bu borada qayta tiklanadigan energiya manbalaridan foydalanishda dadil qadam tashlangan.
"Tizimli ishlar natijasida 2026-yilga borib O'zbekistonda umumiy quvvati 8000 MVt dan ortiq quyosh va shamol elektr stansiyalari hamda 868 MVt quvvatga ega gidroelektr stansiyalari ishlay boshlaydi, - deyiladi maqolada. Ayni paytda Qoraqalpog'iston Respublikasida quvvati 200 MVt bo'lgan shamol elektr stansiyasini qurish bo'yicha tender davom etmoqda".
Qayta tiklanuvchi energiya manbalaridan keng foydalanish tabiiy resurslarni tejash va tabiatga yetkaziladigan zararni kamaytirish imkonini beradi. Bu energiya tarmoqlarini yengillashtirish, avariyalarning oldini olish, texnologik yo'qotishlarni kamaytirish, eng muhimi, ekologik toza, "yashil" energiyaga o'tish jarayonini faollashtirishga yordam beradi. Bunday sa'y-harakatlar nafaqat bugun, balki kelajak uchun ham muhim, deya xulosa qiladi "Diplomat".
596
