Bugun, 7-dekabr kuni Oʻzbekiston Respublikasi Energetika vazirligida yoshlar bilan uchrashuv boʻlib oʻtdi.
Unda Energetika vazirligi rahbariyati, masʼul xodimlari, tizim tashkilotlarining faol yosh xodimlari, Energetika vazirligiga biriktirilgan davlat koʻmagiga muhtoj yoshlar, Yoshlar siyosati va sport vazirligi, Yoshlar ishlari agentligi masʼullari hamda ommaviy axborot vositalari vakillari ishtirok etdi.
Yoshlar siyosati va sport vazirligi masʼuli Mumtozbek Meliqoʻziyev yurtimizda Davlatimiz rahbari tashabbusi bilan yoshlarga oid davlat siyosati mazmun-mohiyati, mazkur yoʻnalishda amalga oshirilayotgan ishlar va ularning istiqbollari xususida maʼlumot berdi.
Shuningdek, uchrashuvda soʻnggi yillarda yurtimizda yoshlarga alohida eʼtibor qaratilayotganligi va ularning barcha sohalar rivoji yoʻlida oʻrni nihoyatda katta ekanligi alohida taʼkidlandi.
Tadbirda vazirlik tomonidan yoshlarga oid davlat siyosatini amalga oshirish boʻyicha yangiliklar, yoshlarga yaratilayotgan imkoniyatlar, davlat koʻmagiga muhtoj boʻlgan yoshlar bilan olib borilayotgan ishlar va kelgusidagi rejalar yuzasidan fikr almashildi. Tadbirda davlat koʻmagiga muhtoj boʻlgan yoshlarning muammolari, ularni qiziqtirgan masalalar tinglandi hamda tegishli chora-tadbirlar belgilab olindi.
Shuningdek, vazirlik tizimida yoshlarga oid amalga oshirilayotgan ishlar haqida maʼlumot berildi. Xususan, bugungi kunda yoqilgʻi-energetika tarmogʻida 105 mingdan ziyod ishchi-xodim faoliyat yuritadi. Shundan 17 ming 400 nafari 30 yoshgacha boʻlgan xodimlarni tashkil etadi. Bugungi kunda 340 nafar yosh rahbarlik lavozimida ishlamoqda.
2023-yil yakuni boʻyicha 262 nafar mutaxassis oliy oʻquv yurtini bitirgandan keyin ishga qabul qilingan boʻlsa, 417 nafar yigit-qiz kollej hamda texnikumlarni tamomlab, ishga kirgan.
Yosh mutaxassislarning tajriba orttirishini tashkil etish maqsadida ular xorij mamlakatlariga xizmat safarlariga va taʼlim olish uchun nufuzli oliy taʼlim muassasalariga yuborilmoqda.
Tadbir soʻngida ishtirokchilarning savollariga atroflicha javoblar berildi.
Tadbir qatnashchilariga Oʻzbekiston Respublikasi Konstitutsiyasi qabul qilinganining 31 yilligi munosabati bilan vazirlikning esdalik sovgʻalari topshirildi.
Oʻzbekiston Respublikasi
Energetika vazirligi Axborot xizmati.
381
