Oliy sud sudyasi Zafarjon Fayziyev bolaligidan isrofni yomon koʻradi. U hatto elektr energiyasining ham uvoli bor, deb biladi. Shu bois har kuni ishdan qaytayotganida doimiy ravishda Oliy sud binosi yoʻlaklarida joylashgan LED-chiroqli 26 ta panelni oʻchirib ketadi.
Z.Fayziyev behuda yonib turgan chiroqlarni oʻchirib yurishda prinsipial shaxs. U hatto ertalab ishga kelganida ham farroshlar unutib yoniq qoldirgan yoritish moslamalarini oʻchirib chiqadi. Kunduzi ham kamida ikki marotaba bino yoʻlkalarida va sud zaliga tushib ketgan sudyalarning xonalarida behuda yonib turgan chiroqlarni oʻchiradi.
Uning bu odati Samarqandda ishlagan vaqtida ham koʻpchilikning ogʻziga tushgan edi. Sudyalarga “Chiroqni oʻchirib yur, qishloqqa ham elektr toki borsin”, deya aytgan iborasini bugun ham yaxshi eslashadi.
"Xoʻp, nima boʻpti shunga?" deysizmi?
Shoshmang. Keling, shunchaki bir xomchoʻt qilib koʻraylik shuni.
Har bir LED-panel 80 vatt quvvatga teng boʻlib, 1 soatda 0,08 kVt·soat elektr energiyasi sarflaydi. Bu bir soatda 80 soʻm deganidir. 26 ta panel oʻrtacha bir sutkada 50 ming soʻm “yozishini” inobatga olsak, sudya Z.Fayziyev boshqalar oʻchirmasdan ketgan yoritish panellarini oʻchirib yurishi bilan bir oyda (22 ish kunida) 1 million 100 ming soʻm, bir yilda esa 13 million 200 ming soʻmni tejamoqda.
Agar buni u Oliy sudda ishlayotgan 5 yilga koʻpaytirsak, Z.Fayziyev hozirgacha 66 million soʻm iqtisod qilinishiga hissa qoʻshgani maʼlum boʻladi.
Bu faqatgina ikkita qavatning yoʻlaklaridagi yoritish panellarini oʻchirib yurishi hisobiga (sudyalar va ayrim xodimlarning xonalaridagi hisoblanmagan).
Z.Fayziyevning elektr energiyasini tejash masalasida ish joyida amalga oshirayotgan ishlari tahsinga loyiq. Agar har bir idorada bir nafardan xodim boʻlsa, tasavvur qilyapsizmi, yuqoridagi raqam nechogʻli ulkan miqdorni tashkil etardi. Va tejalgan million-million kVt·soat elektr energiyasini yurtimizning eng olis hududlariga qadar yetkazish imkoniyati yanada oshgan boʻlardi.
Oʻzbekiston Energetika vazirligi jamoasi bugun Oliy sud sudyasi Zafarjon Fayziyevni milliy davlatchiligimiz, suverenitetimiz, shu kunga qadar erishgan barcha yutuq va marralarimiz, demokratik huquqiy davlat barpo etish yoʻlidagi saʼy-harakatlarimizning mustahkam poydevori boʻlmish Konstitutsiya kuni bilan tabriklab, energiya tejamkorlik hamda energiya samaradorlik ishiga qoʻshayotgan hissasi uchun samimiy minnatdorlik bildirdi.
371
