Ayni kunlarda yurtimizda sovuq ob-havo hukmron. Bunday paytda aholi va ijtimoiy soha obyektlarini tabiiy gaz bilan kafolatli ta’minlash energetika tizimi tashkilotlari, xususan, “O‘ztransgaz” AJ oldidagi asosiy vazifalardan sanaladi.
Shu maqsadda, elektr va issiqlik ta’minoti uchun mas’ul tashkilotlarga bir maromda, yo‘qotishlarsiz, belgilangan hajmda tabiiy gaz yetkazib berish maqsadidagi chora-tadbirlar ayni kunlarda ham davom etmoqda.
Jumladan, Toshkent issiqlik markazi faoliyatini yanada yaxshilash maqsadida olovli ishlar amalga oshirildi. 2022-2023-yillar kuz-qish mavsumida “Binokor” gaz taqsimlash stansiyasidan Toshkent issiqlik markazi tarmog‘iga belgilangan prognozga nisbatan kam tabiiy gaz yetkazib berilgan. Buning asosiy sababi esa tarmoqda boshqa iste’molchilarning mavjudligi edi.
Shu kunlarda “O‘ztransgaz” AJ tomonidan olib borilgan ishlar natijasida issiqlik ta’minoti tarmog‘i boshqa iste’molchilardan ajratilib, issiqlik markaziga ko‘proq hajmdagi tabiiy gaz yetkazib berish, shu orqali uning faoliyatini yanada yaxshilash imkoniyati yaratildi.
Avval xabar berilganidek, Sirdaryo viloyatining Shirin shahri va Boyovut tumanlari hududida quvvati 1500 MVt bo‘lgan zamonaviy issiqlik elektr stansiyasi qurildi. Ayni obyektni tabiiy gaz bilan ta’minlash maqsadida joriy yilda “Shirin” gaz taqsimlash stansiyasida qator tadbirlar amalga oshirildi.
Jumladan, diametri 1020 mm bo‘lgan 4,7 kilometr uzunlikdagi gaz quvuri qurildi, stansiyaning loyihaviy quvvati oshirildi. Shuningdek, issiqlik elektr stansiyasi uchun joriy yilda 2 ta gaz tozalash uskunasi, 2 ta gaz bosimini rostlovchi qurilma, diametri 400 mm bo‘lgan 3 ta gaz o‘lchov moslamasi, yetkazib berilayotgan tabiiy gaz sifatini yanada yaxshilash maqsadida qo‘shimcha ravishda 2 dona tabiiy gazni yuqori darajada tozalovchi qurilma o‘rnatildi.
Hozirgi kunda mazkur IESga bir maromda va sifatli tabiiy gaz yetkazib berish bo‘yicha barcha ishlar amalga oshirildi. Bu tadbirlar kuz-qish mavsumida tabiiy gaz uzatishda barqarorlikka xizmat qiladi.
300
