СИФАТЛИ ЭЛЕКТР ЭНЕРГИЯСИ ЕТКАЗИБ БЕРИШ – ЖАМИЯТ ТАРАҚҚИЁТИГА ХИЗМАТ ҚИЛАДИ
Бугунги кунда мамлакатимиз тараққиёти ва халқимиз фаровонлиги иқтисодий соҳадаги ислоҳотлар самараси билан чамбарчас боғлиқдир. Хусусан, ҳудудларда энергетика соҳасида олиб борилаётган кенг кўламли ислоҳотлар иқтисодиётимизнинг юксалиши, инвестицион салоҳиятнинг ошиши ҳамда халқаро миқёсда ҳамкорлик алоқаларининг ўрнатилишига хизмат қилаётир.
«Навоий ҳудудий электр тармоқлари корхонаси» акциядорлик жамияти томонидан ҳам 2019 йилда соҳа ривожи йўлида тизимли ишлар амалга оширилди. Жумладан, мақсадсиз энергия сарфини камайтириш, аҳолининг бу борадаги маданиятини оширишга алоҳида аҳамият қаратилганини эътироф этиш жоиз.
2019 йилда корхона томонидан ҳудуддаги мавжуд 11 минг 698 километр 0,4 110 кВли электр узатиш тармоқларининг 9,036 километрида жорий, 1,128 километр қисмида мукаммал таъмирлаш ишлари тўлиқ бажарилди. Бундан ташқари, 75 дона 35/110 кВли подстанцияда жорий ва мукаммал таъмирлаш ишлари олиб борилди. Кармана, Навбаҳор, Нурота, Хатирчи ва Қизилтепа туманларидаги юкланиш билан ишлаётган 27 та трансформатор пункти юқори қувватлисига алмаштирилди.
Қиш мавсумида истеъмолчиларни барқарор электр энергияси билан таъминлаш муҳим масала ҳисобланади. Шу мақсадда фавқулодда ўчишларни зудлик билан бартараф этиш учун туман ва шаҳар электр таъминоти корхоналарида 30 дона ҳар хил қувватдаги трансформаторлар захираси яратилди. Мазкур тадбирларнинг амалга оширилиши тармоқлардаги йўқотишларни камайтириш билан бир қаторда, электр ускуналарни 2019-2020 йиллар куз-қиш мавсумида беталафот ишлаши ҳамда электр энергиясини ҳисобга олиш самарадорлигини оширишга хизмат қилади. Шу билан бирга, вилоятнинг олис ва тоғли ҳудудларида аҳоли, ижтимоий соҳа объектлари, тадбиркорлик субъектларини узлуксиз электр энергияси билан таъминлаш мақсадида жамият томонидан 2019 йилда 3,5 миллиард сўм маблағ ҳисобига 20 га яқин махсус техника ва енгил автомашина харид қилинди.
Бундан ташқари «Обод қишлоқ», «Обод маҳалла» ва «Обод марказ» давлат дастурлари доирасида 207,4 километр электр узатиш тармоғи, 50 дона трансформатор пункти янгидан қурилди ва модернизация қилинди. Бу ишларга жами 6 миллиард 946 миллион сўм маблағ сарфланди.
Ҳудудда аҳоли, кичик саноат ва эркин иқтисодий зоналардаги янги ташкил этилаётган корхоналарни етарли миқдорда электр энергияси билан таъминлаш масалаларига ҳам алоҳида эътибор қаратилган. Хусусан, янги 110/6 кВли «БСИ» подстанциясида қуввати 25 мегаватт бўлган трансформаторлар ўрнатилди. Ушбу ишлар учун 9 миллиард сўм маблағ сарфланди. Натижада Навоий шаҳрининг «Бунёдкор», «Бинокор», «Тинчлик» маҳалла фуқаролар йиғинларидаги аҳоли хонадонлари, шунингдек, саноат-иқтисодий зоналарида янги ташкил этилаётган корхоналар учун 9 мегаватт қувват захираси яратилди.
Давлатимиз раҳбарининг 2019 йил 12-13 март кунлари Навоий вилоятига ташрифи давомида соҳага оид берган топшириқларини ўз вақтида бажариш юзасидан 35/10 кВли “Ғазғон” подстанциядаги 2500 ва 4000 кВли куч трансформаторлари қуввати 6300 кВлисига алмаштирилди. Ғозғон шаҳрида ташкил этилаётган инвестиция лойиҳалари учун қўшимча 4 мегаватт қувват захираси яратилиши мақсадларига 1 миллиард 296 миллион сўм маблағ сарфланди.
Сифатли электр энергияси етказиб бериш иқтисодий барқарорликни ошириш, пировардида эртанги фаровон ҳаётимиз учун ҳал этувчи муҳим омиллардан бири эканлигини англаган жамият ходимлари барча имкониятларни ишга солиб, 2020 йилда ҳам салмоқли натижаларга эришиш йўлида меҳнат қилади.
«Навоий ҳудудий электр тармоқлари корхонаси» АЖ матбуот хизмати.
1196
