Assalomu alaykum!
Kecha, 13-dekabr kuni iste’molchilarni energiya resurslari bilan ta’minlash bo‘yicha amalga oshirilgan ishlar haqida ma’lumot beramiz.
13-dekabr kuni elektr stansiyalar orqali 258,6 mln kVt•soat elektr energiyasi ishlab chiqarildi va iste’molchilarga 252,6 mln kVt•soat elektr energiyasi yetkazib berildi.
Buning uchun issiqlik elektr stansiyalarda 45,6 mln kubometr tabiiy gaz, 19,6 ming tonna ko‘mir, 10,3 ming tonna mazut yoqilgan.
Respublika tabiiy gaz iste’moli 164,1 mln kubometrni tashkil qilgan.
Aholi va ijtimoiy soha ob’ektlarini birinchi navbatda tabiiy gaz bilan ta’minlash hamda quvurlardagi bosimni rostlash maqsadida Toshkent shahri, Samarqand, Toshkent, Andijon, Namangan va Farg‘ona viloyatlaridagi metan zapravkalar faoliyatiga qo‘shimcha cheklovlar kiritildi.
Hozirgi vaqtda “Hududgazta’minot” aksiyadorlik jamiyatidan tabiiy gaz oluvchi 1 ming 179 ta metan zapravkaning 547 tasi belgilangan grafik asosida ishlamoqda.
Yuzaga kelgan ortiqcha talabni qoplash maqsadida yuqorida aytib o‘tilgan hududlarda avtobenzin va dizel yonilg‘isi miqdori oshirildi. Buning uchun Buxoro va Farg‘ona neftni qayta ishlash zavodlarining avtobenzin ishlab chiqarish quvvatlari 3,3 ming tonnadan 4 ming tonnaga yetkazildi yoki o‘rtacha kunlik 700 tonna qo‘shimcha avtobenzin ishlab chiqarilishi yo‘lga qo‘yildi.
Shuningdek, Rossiya Federatsiyasidan import asosida olib kelinayotgan AI-92 K5 rusumidagi avtobenzin hajmi oshirildi.
Bu bilan ichki bozorda birja savdolariga chiqariladigan avtobenzin miqdori ko‘paytirilishiga erishildi.
Avtomobillarga gaz to‘ldirish kompressor shoxobchalariga (metan zapravkalar) 4,9 mln kubometr tabiiy gaz hamda 700 tonna suyultirilgan gaz yetkazib berildi. Shuningdek, avtomobillarga yoqilg‘i quyish shoxobchalarida sotish uchun birja savdolariga 3 ming 210 tonna avtobenzin, 20 ming 496 tonna dizel yonilg‘isi qo‘yilgan bo‘lib, undan 3 ming 210 tonna avtobenzin hamda 18 ming 738 tonna dizel yonilg‘isi sotilgan.
Korxonalarda qazib chiqarish va ishlab chiqarish ishlari o‘rnatilgan tartibda olib borilmoqda. Barcha korxonalarda shtablar tuzilgan, 24 soatlik navbatchilik davom etmoqda.
Sovuq havo harorati tufayli quvurlarda gaz bosimining pasayishi natijasida Sirdaryo va To‘raqo‘rg‘on issiqlik elektr stansiyalaridagi 2 ta energoblok qisqa muddatga to‘xtatildi.
Natijada elektr tarmoqlari va transformator punktlarida yuklamalar keskin ortdi.
Yuklama ortishi bois hududlardagi elektr tarmoqlarida yuzaga kelishi mumkin bo‘lgan nosozliklarning oldini olish maqsadida faqatgina sutkaning tig‘iz vaqtlarida qisqa muddatli cheklovlar kiritilmoqda.
Gaz bosimi barqarorlashishi bilan energobloklar ishga tushiriladi va iste’molchilarga elektr energiyasi barqaror yetkazib berilishi ta’minlanadi.
Shu bilan birga, respublika hududlari bo‘ylab elektr tarmoqlari va transformator punktlarida yuklamalarning ortishi hisobiga yuzaga kelgan nosozliklar bartaraf etib borilmoqda.
Kecha mamlakatimiz bo‘ylab elektr qurilmalarda yuzaga kelgan 24 ta, gaz ta’minotida yuzaga kelgan 19 ta nosozlik bartaraf etildi.
Ayni paytda kechasi yuz bergan kuchli shamol tufayli elektr ta’minotidan uzilgan Xorazm, Buxoro va Samarqand viloyatlari ayrim iste’molchilarini tarmoqqa ulash ishlari olib borilmoqda.
Ta’minotdagi uzilishlar bo‘yicha Energetika vazirligi tizim tashkilotlariga elektr qurilmalarida yuzaga kelayotgan nosozliklar bo‘yicha iste’molchilardan kelib tushgan 895 ta murojaat maxsus brigadalar tomonidan bartaraf etildi.
Tabiiy va suyultirilgan gaz ta’minoti bo‘yicha 1027 ta murojaat kelib tushdi. Mavjud kamchiliklarni bartaraf etish bo‘yicha tezkor chora-tadbirlar olib borildi.
Qishning sovuq kunlarida tarmoqlarda yuzaga kelishi mumkin bo‘lgan nosozliklarni bartaraf etish maqsadida elektr va gaz ta’minoti korxonalarida 1 ming 691 ta maxsus brigada tunu kun ishlab, joylarda muammolarni tezkorlik bilan bartaraf etmoqdalar.
Shu o‘rinda iste’molchilardan yana bir marta isitish moslamalariga ehtiyotkorlik bilan munosabatda bo‘lishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qat’iy rioya etishlarini iltimos qilib qolamiz.
Mana shunday sovuq kunlarda barchamiz oqilona ish tutishimiz, bizning ko‘zimizga cheksiz-chegarasiz va tuganmas bo‘lib ko‘rinayotgan qadrli energiya resurslarini asrab-avaylashimiz kerak.
Oddiy aytganda, barchamiz ijtimoiy mas’uliyatni his qilaylik. Zero, bu hammamiz uchun manfaatlidir.
Hurmatli iste’molchilar! Elektr ta’minoti yuzasidan 1154 qisqa raqami yoki “Telegram”dagi @het_admin administratorga, gaz ta’minoti yuzasidan 1104, 104 telefon raqamlari yoki Feysbuk ijtimoiy tarmog‘idagi guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
E’tiboringiz uchun rahmat.
495
