Assalomu alaykum!
Kecha, 14-dekabr kuni iste’molchilarni energiya resurslari bilan barqaror ta’minlash bo‘yicha amalga oshirilgan ishlar haqida ma’lumot beramiz.
14-dekabr kuni elektr stansiyalar orqali 254,5 mln kVt•soat elektr energiyasi ishlab chiqarildi va iste’molchilarga 247,2 mln kVt•soat elektr energiyasi yetkazib berildi.
Buning uchun issiqlik elektr stansiyalarda 43,5 mln kubometr tabiiy gaz, 18,1 ming tonna ko‘mir, 12,1 ming tonna mazut yoqilgan.
Respublika tabiiy gaz iste’moli 159 mln kubometrni tashkil qilgan.
Aholi va ijtimoiy soha obyektlarini birinchi navbatda tabiiy gaz bilan ta’minlash hamda quvurlardagi bosimni rostlash maqsadida hududlarda kiritilgan cheklovlar amal qilib turibdi.
Hozirgi vaqtda “Hududgazta’minot” aksiyadorlik jamiyatidan tabiiy gaz oluvchi 1 ming 204 ta metan zapravkaning 624 tasi belgilangan grafik asosida ishlamoqda.
Yuzaga kelgan ortiqcha talabni qoplash maqsadida yuqorida aytib o‘tilgan hududlarga avtobenzin va dizel yonilg‘isi miqdori oshirilgan tarzda yetkazib berilmoqda. Xususan, kecha “O‘zbekneftgaz” jamiyati tomonidan Farg‘ona vodiysidagi avtomobillarga yonilg‘i quyish shoxobchalariga jami 1028 tonna jumladan, Andijon viloyatida 406 tonna, Namangan viloyatida 346 tonna va Farg‘ona viloyatida 276 tonna avtobenzin yetkazib berildi.
Shuningdek, Rossiya Federatsiyasidan import asosida olib kelinayotgan AI-92 K5 rusumidagi avtobenzin hajmi yanada oshirildi.
Bu bilan ichki bozorda birja savdolariga chiqariladigan avtobenzin miqdori ko‘paytirilishiga erishildi.
Avtomobillarga gaz to‘ldirish kompressor shoxobchalariga (metan zapravkalar) 4,5 mln kubometr tabiiy gaz hamda 800 tonna suyultirilgan gaz yetkazib berildi. Shuningdek, avtomobillarga yoqilg‘i quyish shoxobchalarida sotish uchun birja savdolariga 3 ming 510 tonna avtobenzin, 1 ming 951 tonna dizel yonilg‘isi qo‘yilgan bo‘lib, undan 3 ming 510 tonna avtobenzin hamda 594 tonna dizel yonilg‘isi sotilgan.
Korxonalarda qazib chiqarish va ishlab chiqarish ishlari o‘rnatilgan tartibda olib borilmoqda. Barcha korxonalarda shtablar tuzilgan, 24 soatlik navbatchilik asosida ishlanmoqda.
Gaz bosimining nisbatan sekin ko‘tarilayotgani hamda To‘raqo‘rg‘on issiqlik elektr stansiyasidagi bitta energoblokni ta’mirlash ishlari davom etayotgani bois sutkaning tig‘iz vaqtlarida elektr energiyasi yetkazib berishga qo‘yilgan vaqtinchalik qisqa muddatli cheklovlar davom etyapti.
Shuni alohida ta’kilash kerakki, sutkaning tig‘iz vaqtlarida elektr energiyasi yetkazib berishga qo‘yilgan vaqtinchalik qisqa muddatli cheklovlar yuklama ortishi bois hududlardagi elektr tarmoqlarida yuzaga kelishi mumkin bo‘lgan nosozliklarning oldini olish maqsadida qo‘llanilmoqda.
Gaz bosimi barqarorlashishi hamda energobloklar ishga tushirilishi bilan iste’molchilarga elektr energiyasi barqaror yetkazib berilishi ta’minlanadi.
Shu bilan birga, respublika hududlari bo‘ylab elektr tarmoqlari va transformator punktlarida yuklamalarning ortishi hisobiga yuzaga kelgan nosozliklar bartaraf etib borilmoqda.
Kecha mamlakatimiz bo‘ylab elektr qurilmalarda yuzaga kelgan 15 ta, gaz ta’minotida yuzaga kelgan 9 ta nosozlik bartaraf etildi.
Ta’minotdagi uzilishlar yuzasidan Energetika vazirligi tizim tashkilotlariga iste’molchilardan kelib tushgan 1858 ta murojaat maxsus brigadalar tomonidan bartaraf etildi.
Tabiiy va suyultirilgan gaz ta’minoti bo‘yicha 1037 ta murojaat kelib tushdi. Mavjud kamchiliklarni bartaraf etish bo‘yicha tezkor chora-tadbirlar olib borildi.
Qishning sovuq kunlarida tarmoqlarda yuzaga kelishi mumkin bo‘lgan nosozliklarni bartaraf etish maqsadida elektr va gaz ta’minoti korxonalarida tuzilgan 1 ming 691 ta maxsus brigada tunu kun ishlab, joylarda muammolarni tezkorlik bilan bartaraf etmoqdalar.
Shu o‘rinda iste’molchilardan yana bir marta isitish moslamalariga ehtiyotkorlik bilan munosabatda bo‘lishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qat’iy rioya etishlarini iltimos qilib qolamiz.
Qolaversa, tejamkorlik masalasini ham yoddan chiqarib bo‘lmaydi. Mutaxassislar keltirgan raqamlarga ko‘ra, O‘zbekistondagi 7 million 589 ming abonentning har biri agar 100 vattlik 1 dona cho‘g‘lanma lampani kechasi atigi 8 soat o‘chirib qo‘ysa, bir yilda 2 milliard 215 million 998 ming kilovatt•soat elektr energiyasini (bu mamlakat aholisi umumiy iste’molining 15 foizi deganidir), 1 dona yorug‘lik chiqaruvchi energiyatejamkor LED lampasini kechasi yoqib qo‘yishdan tiyilsa, 310 million kilovatt•soat elektr energiyasi tejab qolinadi.
Agar bunday tejamkorlik aholi orasida ommaviy tus olsa, bu muntazam tok o‘chishlarining oldini olish hamda elektr bilan uzluksiz ta’minlashga xizmat qiladi.
Ko‘rib turganimizdek, aholi vakillari hatto maishiy darajada bo‘la turib ham, ulkan hajmlardagi energiya tejamkorlikka yordam berishlari, birgina xonadonidagi elektr uskunalaridan oqilona va to‘g‘ri foydalanish orqali butun mamlakat miqyosidagi energiya samaradorlikka ulkan hissa qo‘shishlari mumkin ekan.
Hurmatli iste’molchilar! Elektr ta’minoti yuzasidan 1154 qisqa raqami yoki “Telegram”dagi @het_admin administratorga, gaz ta’minoti yuzasidan 1104, 104 telefon raqamlari yoki Facebook ijtimoiy tarmog‘idagi guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
E’tiboringiz uchun rahmat.
455
