![](/uploads/02210d06-a1b4-8a86-61ba-2a68ac67cc21_news_.jpg)
2023-yil 15-dekabr kuni soat 21:30 lar atrofida ijtimoiy tarmoqlar orqali Toshkent viloyati, Nurafshon shahri, Toshkent yo‘li ko‘chasida joylashgan “UNG Petro” mas’uliyati cheklangan jamiyatiga qarashli “To‘ytepa” nomli avtomobillarga yonilg‘i quyish shoxobchasida sotilayotgan avtobenzin bo‘yicha e’tirozli videolavha tarqaldi.
Unda Chirchiq shahar Kengashi deputati Jahongir To‘laganov hamda bloger Qobil Do‘sov noma’lum mijoz aynan shu shoxobchada AI-80 rusumidagi benzin AI-92 deb aldab sotilayotgani to‘g‘risida ma’lumot berganini aytib, shoxobcha ishchi-xizmatchilari bilan tortishishayotgani aks etgan. Videoni ko‘rgan ziyrak tomoshabin ayni vaziyatda blogerning mast holatda ekanini sezishi qiyin emas.
![](https://telegra.ph/file/af8b2974261c1e22a33dd.png)
Ushbu murojaatdan xabar topgan va aynan o‘sha vaqtda boshqa bir hududda o‘rganish olib borayotgan Energetika vaziri J.Mirzamahmudov, “O‘zenergoinspeksiya” boshlig‘i I.Nimatullayev hamda “O‘zbekneftgaz” AJ boshqaruvi raisi B.Sidikov holatni to‘g‘ri va xolisona baholash uchun voqea joyiga zudlik bilan yetib bordi.
J.To‘laganov hamda Q.Do‘sovga qo‘ng‘iroq qilinib, ularning ishtirokida “O‘zenergoinspeksiya” Toshkent nazorat-kimyo laboratoriyasi tomonidan benzindan tahlil uchun namunalar olinishi aytilganida, ular bu taklifni rad etishdi.
![](https://telegra.ph/file/ef3b86adef228b5e00acc.png)
Shundan so‘ng xolislar va guvohlar ishtirokida bloger “AI-80 quyilyapti”, deb taxmin qilgan 4-sonli sig‘imda saqlanayotgan AI-92-rusumli hamda YOTUning 12-sonli dastakidan AI-92 rusumli, shuningdek, 3-sonli sig‘imda saqlanayotgan AI-80 rusumli avtobenzindan o‘rnatilgan tartibda sifat tahlili uchun namunalar olindi.
Olingan namunalar “O‘zenergoinspeksiya” Toshkent nazorat-kimyo laboratoriyasida sifat tahlilidan o‘tkazildi.
![](https://telegra.ph/file/abe9601f8f82df71a3cb0.png)
Laboratoriya tahlili bloger “AI-80 rusumidagi benzin”, deb gumon qilgan benzindagi oktan soni 92,3 ekanligini ko‘rsatdi. Bu miqdor AI-92 rusumidagi benzin uchun xosdir.
“O‘zbekneftgaz” AJ mazkur voqeani shunday qoldirmaydi va ijtimoiy tarmoq orqali yolg‘on ma’lumot tarqatib, odamlarni chalg‘itgan, nohaq ayblov orqali kompaniya imidjiga hamda AYQShlarda mehnat qilayotgan xodimlar sha’ni va ishchanlik obro‘siga putur yetkazgan blogerga nisbatan qonuniy choralar ko‘rilishini so‘rab huquqni muhofaza etuvchi organlarga murojaat qilishini bildiradi.
![](https://telegra.ph/file/56df2d05f259ba26a4012.png)
Ijtimoiy tarmoqlar va norasmiy telegram kanallar adminlaridan esa bir yoqlama fikrlarga asoslangan ma’lumotlarni o‘rganmasdan turib tarqatmasliklarini so‘raymiz.
![](/img/view_icon.png)