Assalomu alaykum!
Kecha, 16-dekabr kuni isteʼmolchilarni energiya resurslari bilan barqaror taʼminlash boʻyicha amalga oshirilgan ishlar haqida maʼlumot beramiz.
16-dekabr kuni elektr stansiyalar orqali jami 255,6 mln kVt·soat – rejaga nisbatan 103 foiz koʻp elektr energiyasi ishlab chiqarildi va isteʼmolchilarga 246,8 mln kVt·soat, rejaga nisbatan 105 foiz koʻp elektr energiyasi yetkazib berildi.
Buning uchun issiqlik elektr stansiyalarida 44,6 mln kubometr tabiiy gaz, 17,5 ming tonna koʻmir, 11,7 ming tonna mazut yoqilgan.
Respublika tabiiy gaz isteʼmoli 159,4 mln kubometrni tashkil qilgan.
Aholi va ijtimoiy soha obyektlarini birinchi navbatda tabiiy gaz bilan taʼminlash hamda quvurlardagi bosimni bir meʼyorda tutib turish maqsadida metan zapravkalarga kiritilgan cheklovlar bosqichma-bosqich yumshatib borilmoqda. Barcha hududlardagi metan zapravkalar mahalliy hokimliklar tomonidan tasdiqlangan reja-grafik asosida ish faoliyatini davom ettiryapti.
Kecha “Hududgaztaʼminot” aksiyadorlik jamiyatidan tabiiy gaz oluvchi 1 ming 204 ta metan zapravkaning 707 tasi belgilangan grafik asosida ishladi.
Avtobenzin va dizel yonilgʻisi boʻyicha yuzaga kelgan ortiqcha talabni qoplash maqsadida mazkur mahsulotlar hududlarga miqdori oshirilgan tarzda yetkazib berilmoqda. Masalan, kecha “Oʻzbekneftgaz” aksiyadorlik jamiyati tomonidan mamlakatimizdagi barcha avtomobillarga yonilgʻi quyish shoxobchalariga jami 2601 tonna avtobenzin yetkazib berildi.
Ishlayotgan metan zapravkalarga 6,7 mln kubometr tabiiy gaz hamda 700 tonna suyultirilgan gaz yetkazildi.
Vazirlik tizimidagi tashkilotlar korxonalarida qazib chiqarish va ishlab chiqarish ishlari oʻrnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik asosida ishlamoqda.
Isteʼmolning oshib borishi natijasida gaz bosimining pasaygani tufayli Toʻraqoʻrgʻon issiqlik elektr stansiyaci 2-son energobloki rezervga oʻtkazildi. Shu bois sutkaning tigʻiz vaqtlarida elektr energiyasi yetkazib berishga qoʻyilgan vaqtinchalik qisqa muddatli cheklovlar davom etyapti.
Agar sutkaning tigʻiz vaqtlarida elektr energiyasi yetkazib berishga vaqtinchalik qisqa muddatli cheklovlar kiritilmasa, hududlardagi elektr tarmoqlarida kutilmagan nosozliklar yuzaga kelishi va bu isteʼmolchilarni elektr energiyasi bilan taʼminlashda qoʻshimcha murakkabliklarni tugʻdirishi mumkin.
Gaz bosimi barqarorlashgach, sutkaning tigʻiz vaqtlarida elektr energiyasi yetkazib berishga qoʻyilgan mazkur vaqtinchalik qisqa muddatli cheklovlar olib tashlanadi.
Respublika hududlari boʻylab elektr tarmoqlari va transformator punktlarida yuklamalarning ortishi hisobiga yuzaga kelgan nosozliklar bartaraf etib borilmoqda.
Kecha mamlakatimiz boʻylab elektr qurilmalarda yuzaga kelgan 13 ta, gaz taʼminotida yuzaga kelgan 3 ta nosozlik bartaraf qilindi.
Taʼminotdagi uzilishlar yuzasidan Energetika vazirligi tizim tashkilotlariga isteʼmolchilardan kelib tushgan 694 ta murojaat maxsus brigadalar tomonidan bartaraf etildi.
Tabiiy va suyultirilgan gaz taʼminoti boʻyicha 563 ta murojaat kelib tushdi. Mavjud kamchiliklarni bartaraf etish boʻyicha tezkor chora-tadbirlar olib borildi.
Tarmoqlarda nosozliklarni bartaraf qilish maqsadida elektr va gaz taʼminoti korxonalarida tuzilgan barcha maxsus brigadalar tunu kun ishlab, joylarda muammolarni tezkorlik bilan bartaraf etmoqdalar.
Shu oʻrinda isteʼmolchilardan yana bir marta isitish moslamalariga ehtiyotkorlik bilan munosabatda boʻlishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qatʼiy rioya etishlarini iltimos qilib qolamiz.
Energoresurslardan ham tejamkorlik bilan foydalanish, ishlatilmayotgan elektr uskunalarini tarmoqdan uzib qoʻyish, behuda yonayotgan chiroqlar, reklama yoritkichlari hamda boshqa manbalarni oʻchirib yurish orqali elektr tarmoqlariga tushadigan kuchlanishni kamaytirishimiz mumkinligini yana bir bor eslatib oʻtamiz.
Hurmatli isteʼmolchilar! Elektr taʼminoti yuzasidan 1154 qisqa raqami yoki “Telegram”dagi @het_admin administratorga, gaz taʼminoti yuzasidan 1104, 104 telefon raqamlari yoki Facebook ijtimoiy tarmogʻidagi guruhga hamda koʻmir taʼminoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
Eʼtiboringiz uchun rahmat.
296
