Assalomu alaykum!
Kecha, 25-dekabr kuni isteʼmolchilarni energiya resurslari bilan barqaror taʼminlash, mavjud muammolar va ularni bartaraf etish boʻyicha amalga oshirilgan ishlar haqida maʼlumot beramiz.
25-dekabr kuni elektr stansiyalar orqali jami 239,9 mln kVt·soat elektr energiyasi ishlab chiqarildi va isteʼmolchilarga 220,3 mln kVt·soat elektr energiyasi yetkazib berildi.
Buning uchun issiqlik elektr stansiyalarida 45,5 mln kubometr tabiiy gaz, 18,4 ming tonna koʻmir hamda 5,3 ming tonna mazut yoqildi.
Respublika tabiiy gaz isteʼmoli 144,1 mln kubometrni tashkil qildi.
Aholi va ijtimoiy soha obyektlarini birinchi navbatda tabiiy gaz bilan taʼminlash hamda quvurlardagi bosimni bir meʼyorda tutib turish maqsadida metan zapravkalarga kiritilgan cheklovlar bosqichma-bosqich yumshatib borilmoqda. Barcha hududlardagi avtomobillarga gaz toʻldirish kompressor shoxobchalarning ish faoliyati mahalliy hokimliklar tomonidan tasdiqlangan reja-grafik asosida tizimli ravishda yoʻlga qoʻyilgan.
Kecha mamlakatimizda 1 ming 357 ta metan zapravka belgilangan grafik asosida ishladi.
Avtobenzin va dizel yonilgʻisi boʻyicha yuzaga kelgan ortiqcha talabni qoplash maqsadida mazkur mahsulotlar hududlarga miqdori oshirilgan tarzda yetkazib berilmoqda. Xususan, kecha “Oʻzbekneftgaz” aksiyadorlik jamiyati tomonidan mamlakatimizdagi barcha avtomobillarga yonilgʻi quyish shoxobchalariga jami 3221 tonna avtobenzin yetkazib berildi.
Ishlayotgan metan zapravkalarga 15,2 mln kubometr tabiiy gaz hamda 700 tonna suyultirilgan gaz yetkazildi. Shuningdek, birja savdolariga avtomobillarga yoqilgʻi quyish shoxobchalarida sotish uchun 4 ming 600 tonna avtobenzin, 1 ming 906 tonna dizel yonilgʻisi qoʻyilgan boʻlib, undan 4 ming 600 tonna avtobenzin hamda 452 tonna dizel yonilgʻisi sotildi.
Vazirlik tizimidagi tashkilotlar korxonalarida qazib chiqarish va ishlab chiqarish ishlari oʻrnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik asosida ishlamoqda.
Respublika hududlari boʻylab elektr tarmoqlari va transformator punktlarida yuklamalarning ortishi hisobiga yuzaga kelayotgan nosozliklar ham zudlik bilan bartaraf etib borilmoqda.
Kecha mamlakatimiz boʻylab elektr qurilmalarida yuzaga kelgan 14 ta, gaz taʼminotida yuzaga kelgan 5 ta nosozlik bartaraf qilindi.
Taʼminotdagi uzilishlar yuzasidan Energetika vazirligi tizim tashkilotlariga isteʼmolchilardan kelib tushgan 187 ta murojaat maxsus brigadalar tomonidan bartaraf etildi.
Tabiiy va suyultirilgan gaz taʼminoti boʻyicha 101 ta murojaat kelib tushdi. Mavjud kamchiliklarni bartaraf qilish boʻyicha tezkor chora-tadbirlar olib borildi.
Tarmoqlarda nosozliklarni bartaraf etish maqsadida elektr va gaz taʼminoti korxonalarida tuzilgan maxsus brigadalar ishchi-xodimlari tunu kun ishlab, joylarda yuzaga kelayotgan muammolarni tezkorlik bilan bartaraf qilmoqdalar.
Shu oʻrinda isteʼmolchilardan yana bir marta isitish moslamalariga ehtiyotkorlik bilan munosabatda boʻlishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qatʼiy rioya etishlarini iltimos qilamiz.
Ob-havo harorati koʻtarilib, kunlar isib qolgan shu fursatlarda biz siz, aziz yurtdoshlarimizdan energiya resurslaridan tejamkorlik bilan foydalanishinglarni yana bir karra soʻrab qolamiz. Agar uyingiz isib ketgan boʻlsa, derazalarni lang ochib qoʻyish emas, balki isitkichlar haroratini pasaytirish, konditsionerlarni tarmoqdan uzib qoʻyish eng oqilona yechimdir.
Bizning koʻzimizga cheksiz-chegarasiz va tuganmas boʻlib koʻrinayotgan qadrli energiya resurslarini asrab-avaylashimiz kerak.
Oddiy aytganda, barchamiz ijtimoiy masʼuliyatni his qilaylik. Zero, bu hammamiz uchun manfaatlidir.
Hurmatli isteʼmolchilar! Elektr taʼminoti yuzasidan 1154 qisqa raqami yoki “Telegram”dagi @het_admin administratorga, gaz taʼminoti yuzasidan 1104, 104 telefon raqamlari yoki Facebook ijtimoiy tarmogʻidagi guruhga hamda koʻmir taʼminoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
Eʼtiboringiz uchun rahmat.
393
