Joriy yilning shu kuniga qadar “O‘zenergoinspeksiya” tomonidan 9 ming 446 ta holatda iste’molchilar tomonidan tabiiy gaz va elektr energiyasidan noqonuniy foydalanish holatlari aniqlandi
Bu haqda AOKAda o‘tkazilgan brifingda “O‘zenergoinspeksiya” Axborot xizmati rahbari Navro‘z Norboboyev ma’lum qildi:
Joriy yilning shu kuniga qadar “O‘zenergoinspeksiya” tomonidan huquqni muhofaza qiluvchi organlar va elektr hamda gaz ta’minoti korxonalari mutaxassislari bilan hamkorlikda o‘tkazilgan nazorat tadbirlarida 9 ming 446 ta holatda iste’molchilar tomonidan tabiiy gaz va elektr energiyasidan noqonuniy foydalanish holatlari aniqlandi. Xususan:
767 mln kubometr tabiiy gaz (748 mlrd 600 mln so‘m) va 335 mln kilovatt·soat elektr energiyasi (251 mlrd 900 mln so‘m) talon-toroj qilingan. Buning natijasida davlat manfaatlariga jami 1 trln 500 mln so‘m zarar yetkazilganligi ma’lum bo‘ldi.
Shuningdek, 2 ming 134 ta ma’muriy qoidabuzarlik holatlari aniqlandi. Buning natijasida 204 mlrd so‘m miqdoridagi jarimalar undirishga qaratilib, “e-mamuriy ish” axborot tizim orqaliy sud organlariga yuborildi.
Inspeksiyaning Toshkent markaziy nazorat-kimyo laboratoriyasi tomonidan neft mahsulotlari bo‘yicha olib borilgan sifat nazorati tadbirlari davomida xususiy avtomobillarga yoqilg‘i quyish shoxobchalarida 171 ta holatda 2 mln 823 ming litr neft mahsulotlarining sifatsizligi aniqlanib, sotuvga chiqarilishi oldi olindi.
Inspeksiya tomonidan iste’molchilarga davlat xizmatlarini ko‘rsatish bo‘yicha jami 10 ming 369 ga yaqin obyektlarning elektr ta’minoti loyihalari ekspertizadan o‘tkazilib, 7 ming 364 ta iste’molchining elektr qurilmalari elektr tarmoqlariga ulanishiga ruxsat berildi. Shuningdek, Hududiy elektr tarmoqlari korxonalariga tegishli 3 ming 47 ta obyektning elektr ta’minoti loyihalari kelishildi.
Joriy yilning shu davriga qadar “O‘zenergoinspeksiya” tomonidan o‘tkazilgan nazorat tadbirlarida elektr tarmoq xo‘jaligi obyektlarining muhofaza zonalarida noqonuniy qurilgan 9 ming 57 ta obyekt aniqladi.
Aniqlangan 7 ming 636 ta obyekt bo‘yicha mahalliy hokimliklar va sudlarga hujjatlar taqdim etilgan bo‘lib, ushbu noqonuniy qurilishlarni xavfsiz hududlarga ko‘chirish yuzasidan ishlar olib borilmoqda. Ayni vaqtgacha 91 ta obyekt xavfsiz hududlarga ko‘chirildi.
Energiya resurslaridan ayrim “tadbirkor”larning noqonuniy va o‘g‘rincha foydalanishlari tarmoqlarda ortiqcha yuklanishlarga hamda energiya resurslar ta’minoti barqarorligiga jiddiy ta’sir ko‘rsatmoqda.
Hurmatli tadbirkorlik subyektlari, elektr va gaz tarmoqlariga tijorat maqsadlarida o‘zboshimchalik bilan ulanish yoxud hisobga olish asboblariga tashqaridan aralashish yo‘li bilan talon-toroj qilish holatlari uchun qonunchilikda belgilangan qat’iy choralar ko‘rilishini unutmang!
431
