Oʻzbekiston Respublikasi Oliy Majlisi huzuridagi Axborot sohasini va ommaviy kommunikatsiyalarni rivojlantirish masalalari boʻyicha jamoatchilik kengashi tomonidan 2023-yilning iyul va dekabr oylarida respublika ijro etuvchi hokimiyat organlari faoliyatining axborot jihatdan ochiqligi yuzasidan monitoring oʻtkazildi.
Unga koʻra, 2023-yilning yanvar oyidan boshlab to dekabr oyiga qadar boʻlgan davrda Oʻzbekistonda faoliyat yuritib kelgan 21 ta respublika ijro etuvchi hokimiyat organining eng koʻp oʻqiladigan 50 ta elektron milliy OAVdagi chiqishlari monitoring qilindi va yakuniy reytingi tuzildi.
Reyting koʻrsatkichlari respublika ijro etuvchi hokimiyat organlari hamda ularning mansabdor shaxslari toʻgʻrisida chop etilgan maqolalar va koʻrishlar soni, shuningdek, tanqidiy maqolalarga nisbatan bildirilgan munosabatlar asosida shakllantirilgan.
Mazkur reytingda Oʻzbekiston Respublikasi Energetika vazirligi 0,5892 koʻrsatkich bilan 6-oʻrinni egallab turibdi.
Bir yil muqaddam xuddi shunday reytingda Vazirlik 13-pogʻonada qayd etilgandi.
Ushbu salmoqli oʻsish Energetika vazirligi rahbariyati va jamoasining tobora ochiqlik, shaffoflik hamda hisobdorlik masʼuliyati ortayotganini va Vazirlik o‘z faoliyatini ilgʻor xalqaro standartlar hamda ochiqlik borasidagi samaradorlik koʻrsatkichlariga tayanib olib borayotganini yana bir karra isbotladi.
Energetika vazirligi kelgusi yilda ham mazkur standartlarga qatʼiy amal qilgan holda, ochiqlik, shaffoflik va hisobdorlik bilan ish yuritishda davom etadi.
475
