Assalomu alaykum!
Kecha, 29-dekabr kuni iste’molchilarni energiya resurslari bilan barqaror ta’minlash bo‘yicha amalga oshirilgan ishlar haqida ma’lumot beramiz.
29-dekabr kuni elektr stansiyalar orqali jami 244,3 mln kVt·soat elektr energiyasi ishlab chiqarildi va iste’molchilarga 226,4 mln kVt·soat elektr energiyasi yetkazib berildi.
Buning uchun issiqlik elektr stansiyalarida 48,5 mln kubometr tabiiy gaz, 19,2 ming tonna ko‘mir hamda 5,3 ming tonna mazut yoqildi.
Respublika tabiiy gaz iste’moli 154,7 mln kubometrni tashkil qildi.
Aholi va ijtimoiy soha obyektlarini birinchi navbatda tabiiy gaz bilan ta’minlash hamda quvurlardagi bosimni bir me’yorda tutib turish maqsadida metan zapravkalarga kiritilgan cheklovlar bosqichma-bosqich yumshatib borilmoqda. Barcha hududlardagi avtomobillarga gaz to‘ldirish kompressor shoxobchalarning ish faoliyati mahalliy hokimliklar tomonidan tasdiqlangan reja-grafik asosida tizimli ravishda yo‘lga qo‘yilgan.
Kecha mamlakatimizda 1 ming 358 ta metan zapravka belgilangan grafik asosida ishladi.
Avtobenzin va dizel yonilg‘isi talabni qoplaydigan darajada yetkazib berilmoqda. Xususan, 29-dekabr kuni “O‘zbekneftgaz” aksiyadorlik jamiyati tomonidan mamlakatimizdagi barcha avtomobillarga yonilg‘i quyish shoxobchalariga jami 4058 tonna avtobenzin yetkazildi.
Kecha metan zapravkalarga joriy oy boshidan beri eng ko‘p – 16,2 mln kubometr tabiiy gaz yetkazib berildi. Bu mavjud talabni 106 foiz qoplash imkonini berdi. Shuningdek, propanga mo‘ljallangan avtomobillar uchun 900 tonna suyultirilgan gaz berildi.
Birja savdolariga avtomobillarga yonilg‘i quyish shoxobchalarida sotish uchun 2 ming 922 tonna avtobenzin va 2 ming 661 tonna dizel yonilg‘isi qo‘yilgan bo‘lib, undan 2 ming 922 tonna avtobenzin hamda 1 ming 11 tonna dizel yonilg‘isi sotildi.
Vazirlik tizimidagi tashkilotlar korxonalarida qazib chiqarish va ishlab chiqarish ishlari o‘rnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik asosida ishlayapti.
Respublika hududlari bo‘ylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar ham zudlik bilan bartaraf etib borilmoqda.
Kecha mamlakatimiz bo‘ylab elektr qurilmalarida yuzaga kelgan 7 ta, gaz ta’minotida yuzaga kelgan 3 ta nosozlik bartaraf qilindi.
Ta’minotdagi uzilishlar yuzasidan Energetika vazirligi tizim tashkilotlariga iste’molchilardan kelib tushgan 156 ta murojaat maxsus brigadalar tomonidan bartaraf etildi.
Tabiiy va suyultirilgan gaz ta’minoti bo‘yicha 170 ta murojaat kelib tushdi. Mavjud kamchiliklarni bartaraf qilish bo‘yicha tezkor chora-tadbirlar olib borildi.
Tarmoqlarda yuzaga kelayotgan nosozliklarni tezkor ta’mirlash maqsadida elektr va gaz ta’minoti korxonalarida tuzilgan 1 ming 691 ta maxsus brigada safidagi 7 ming 300 nafardan ziyod ishchi-xodimlar tunu kun ishlab, joylarda yuzaga kelayotgan muammolarni tezkorlik bilan bartaraf etmoqdalar.
Shu o‘rinda iste’molchilardan yana bir marta isitish moslamalariga ehtiyotkorlik bilan munosabatda bo‘lishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qat’iy rioya etishlarini iltimos qilib qolamiz.
Bayram kunlarini maroqli va ko‘ngilli o‘tkazishlaringizni tilaymiz.
Hurmatli iste’molchilar! Dam olish va bayram kunlari mobaynida elektr energiyasi hamda gaz ta’minotida qandaydir muammolar yuzaga kelsa, elektr ta’minoti yuzasidan 1154 qisqa raqami yoki “Telegram”dagi @het_admin administratorga, gaz ta’minoti yuzasidan 1104, 104 telefon raqamlari yoki Facebook ijtimoiy tarmog‘idagi guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin. Energetika tizimidagi maxsus brigadalar tunu kun Sizning xizmatingizda ekanligini yana bir karra eslatib o‘tamiz.
E’tiboringiz uchun rahmat.
366
