Assalomu alaykum!
Kecha, 7-yanvar kuni iste’molchilarni energiya resurslari bilan barqaror ta’minlash bo‘yicha amalga oshirilgan ishlar haqida ma’lumot beramiz.
7-yanvar kuni elektr stansiyalar orqali jami 234,1 mln kVt·soat elektr energiyasi ishlab chiqarildi va iste’molchilarga 219,5 mln kVt·soat elektr energiyasi yetkazib berildi.
Buning uchun issiqlik elektr stansiyalarida 48,5 mln kubometr tabiiy gaz, 20,6 ming tonna ko‘mir hamda 1,2 ming tonna mazut yoqildi.
Respublika tabiiy gaz iste’moli 151,1 mln kubometrni tashkil qildi.
Kecha mamlakatimizdagi 1 ming 382 ta metan zapravka orqali iste’molchilarga 14,1 mln kubometr tabiiy gaz yetkazib berildi. Shuningdek, avtomobillarga gaz quyish stansiyalari orqali
600 tonna suyultirilgan gaz sotildi.
Avtobenzin va dizel yonilg‘isi ehtiyojni qoplaydigan darajada yetkazib berilmoqda. Xususan, kecha “O‘zbekneftgaz” aksiyadorlik jamiyati tomonidan avtomobillarga yonilg‘i quyish shoxobchalariga jami 1 ming 435 tonna avtobenzin yetkazildi.
Vazirlik tizimidagi tashkilotlar korxonalarida qazib chiqarish va ishlab chiqarish ishlari o‘rnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik asosida ishlayapti.
Respublika hududlari bo‘ylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar tezkor bartaraf etib borilmoqda.
Kecha mamlakatimiz bo‘ylab yuz bergan kuchli shamol va yomg‘ir tufayli elektr qurilmalarida 15 ta nosozlik yuzaga keldi.
Xususan, soat 17:54 da Toshkent shahrida yuqori kuchlanishli elektr liniyasida yuz bergan nosozlik oqibatida poytaxtimizning Chilonzor, Shayxontohur va Olmazor tumanlaridagi 3 ming 300 ta iste’molchi ma’lum muddat elektr energiyasi ta’minotidan uzildi. Garchi kuchli yomg‘ir nosozlikni bartaraf etish vaqtida ko‘plab noqulayliklar tug‘dirgan bo‘lsa-da, maxsus brigadalar xodimlari jonbozlik ko‘rsatib, nosozlikni qisqa fursatda bartaraf etishga muvaffaq bo‘lishdi. Soat 19:47 da ta’minotdan uzilgan iste’molchilarning bir qismi, soat 20:15 da esa barchasi to‘liq ta’minotga ulandi.
Ta’minotdagi uzilishlar yuzasidan Energetika vazirligi tizim tashkilotlariga iste’molchilardan kelib tushgan 105 ta murojaat maxsus brigadalar tomonidan bartaraf etildi.
Shuningdek, kecha gaz ta’minotida yuzaga kelgan 4 ta nosozlik ham maxsus brigadalar tarafidan bartaraf qilindi.
Tabiiy va suyultirilgan gaz ta’minoti bo‘yicha kelib tushgan 70 ta murojaat bo‘yicha ham tezkor chora-tadbirlar olib borildi.
Tarmoqlarda yuzaga kelayotgan nosozliklarni kechiktirmasdan ta’mirlash maqsadida elektr va gaz ta’minoti korxonalarida tuzilgan maxsus brigadalar tunu kun ishlab, joylarda yuzaga kelayotgan muammolarni tezkorlik bilan bartaraf etmoqdalar.
Hurmatli iste’molchilar! Elektr ta’minoti yuzasidan 1154 qisqa raqami yoki “Telegram”dagi @het_admin administratorga, gaz ta’minoti yuzasidan 1104, 104 telefon raqamlari yoki Facebook ijtimoiy tarmog‘idagi maxsus guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
E’tiboringiz uchun rahmat.
291
