SEUL, 30-dekabr. /"Dunyo" AA/. O'zbekiston Prezidenti Shavkat Mirziyoyev mamlakatimizning oltita hududida 5 ta quyosh va 1 ta shamol elektr stansiyalarini ishga tushirish va tarmoqqa ulashga bag'ishlangan tantanali marosimdagi ishtiroki Janubiy Koreya matbuotida keng yoritildi, deb xabar bermoqda "Dunyo" AA muxbiri.
Xususan, mamlakatdagi yetakchi nashrlardan biri "Diplomacy Journal" jurnali o'z sahifasida ushbu tadbir haqida yozar ekan, unda muhim investitsiya loyihalarining hamkorlari bo'lgan "Masdar", "China Energy Engineering Corporation", "China Energy International Group", "China Gezhouba Group", "SEPCO III", "Dongfang Electric Corporation" kabi kompaniyalar rahbarlari ham qatnashganiga e'tibor qaratdi.
Jurnalda yozilishicha, O'zbekistonda energetika tizimini isloh qilish va barqarorligini oshirish bo'yicha keng ko'lamli dastur amalga oshirilmoqda. Keyingi yillarda tarmoqda xususiy sektor va yetakchi xorijiy kompaniyalar faoliyatiga qulay sharoitlar yaratildi. Ular ishtirokida O'zbekistonda qayta tiklanadigan energetika salohiyatini kengaytirishga qaratilgan ko'plab loyihalar muvaffaqiyatli amalga oshirilmoqda.
Xususan, ilk bor 100 foiz to'g'ridan-to'g'ri xorijiy investitsiyalar hisobidan, davlat-xususiy sheriklik asosida Karmana va Nurobod tumanlarida umumiy quvvati 200 megavattlik quyosh stansiyalari barpo etilib, o'tgan davrda ular 1 milliard kilovatt soat "yashil" elektr energiyasini ishlab chiqardi.
Marosimda O'zbekiston rahbari xorijiy hamkorlar bilan birgalikda yangi energetika quvvatlarini ishga tushirish va tarmoqqa ulashga start berdi. Bu loyihalarga katta amaliy hissa qo'shgan investorlar, muhandis va quruvchilarga alohida minnatdorlik bildirildi, deb yozadi "Diplomacy Journal".
Bundan tashqari, jurnal o'z rasmiy saytida O'zbekiston Prezidenti Shavkat Mirziyoyevning "yashil" energetika sohasidagi yirik qo'shma loyihalarni ishga tushirishga bag'ishlangan tantanali marosimdagi nutqining ingliz tilidagi to'liq matnini ham e'lon qildi.
243
