Assalomu alaykum!
8-yanvar kuni iste’molchilarni energiya resurslari bilan barqaror ta’minlash bo‘yicha amalga oshirilgan ishlar haqida ma’lumot beramiz.
Kecha elektr stansiyalar orqali jami 238,8 mln kVt·soat elektr energiyasi ishlab chiqarildi. Buning uchun issiqlik elektr stansiyalarida 49,6 mln kubometr tabiiy gaz, 20,7 ming tonna ko‘mir hamda 800 tonna mazut yoqildi.
Respublika elektr energiyasi iste’moli 225,3 mln kVt·soatni, tabiiy gaz iste’moli esa 152,8 mln kubometrni tashkil qildi.
Shuningdek, mamlakatimizdagi 1 ming 373 ta metan zapravkada 14 mln kubometr tabiiy gaz sotildi. Avtomobillarga gaz quyish stansiyalari orqali 600 tonna suyultirilgan gaz yetkazildi.
Avtobenzin va dizel yonilg‘isi ehtiyojni qoplaydigan darajada yetkazib berilmoqda. Xususan, kecha “O‘zbekneftgaz” aksiyadorlik jamiyati tomonidan mamlakatimizdagi barcha avtomobillarga yonilg‘i quyish shoxobchalariga 3 ming 660 tonna avtobenzin yetkazib berildi.
Shuningdek, kecha birja savdolariga avtomobillarga yonilg‘i quyish shoxobchalarida sotish uchun 3 ming 360 tonna avtobenzin, 3 ming 50 tonna dizel yonilg‘isi qo‘yilgan bo‘lib, undan 2 ming 864 tonna avtobenzin hamda 1 ming 760 tonna dizel yonilg‘isi sotildi.
Vazirlik tizimidagi tashkilotlar korxonalarida qazib chiqarish va ishlab chiqarish ishlari o‘rnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik asosida ishlayapti.
Respublika hududlari bo‘ylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar tezkor bartaraf etib borilmoqda. Elektr va gaz ta’minoti korxonalarida tuzilgan maxsus brigadalar tunu kun ishlab, tarmoqlarda yuzaga kelayotgan nosozliklarni kechiktirmasdan ta’mirlamoqdalar.
Kecha mamlakatimiz bo‘ylab elektr qurilmalarida yuzaga kelgan 2 ta, gaz ta’minotida yuzaga kelgan 3 ta nosozlik bartaraf qilindi.
Xususan, soat 08:21 da Surxondaryo viloyatida kuchli shamol oqibatida 6-10 kV kuchlanishli 37 ta tarmoq 26 megavatt quvvat bilan avariyaviy o‘chgan. Natijada viloyatdagi 14 ming 200 ta iste’molchi elektr ta’minotidan uzilgan. Maxsus brigadalarning sa’y-harakatlari bilan barcha iste’molchilar qisqa fursatlarda qayta ulandi.
Elektr ta’minotidagi uzilishlar yuzasidan Energetika vazirligi tizim tashkilotlariga iste’molchilardan kelib tushgan 160 ta murojaat maxsus brigadalar tomonidan bartaraf etildi.
Tabiiy va suyultirilgan gaz ta’minoti bo‘yicha kelib tushgan 191 ta murojaat bo‘yicha ham tezkor chora-tadbirlar olib borildi.
Hurmatli iste’molchilar! Elektr energiyasi ta’minoti yuzasidan 1154 qisqa raqami yoki “Telegram”dagi @het_admin administratorga, gaz ta’minoti yuzasidan 1104, 104 telefon raqamlari yoki Facebook ijtimoiy tarmog‘idagi maxsus guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
E’tiboringiz uchun rahmat.
325
