QOHIRA, 9-yanvar. /«Dunyo» AA/. Misrning ommabop «Sada al-Balad» axborot agentligi veb-saytida «O'zbekistonning iqlim o'zgarishiga qarshi global kurashga qo'shgan hissasi» sarlavhali maqola e’lon qilindi, deb xabar bermoqda «Dunyo» AA muxbiri.
«So'nggi yillarda iqlim o'zgarishining salbiy oqibatlarini moslashtirish va yumshatish masalalari global barqaror rivojlanish kun tartibida, jumladan, O'zbekistonda ham muhim o'rin tutmoqda, - deyiladi maqolada. - O'zbekiston iqlim o'zgarishiga eng zaif davlat sifatida ko'p yillar davomida Orol dengizining qurishi, cho'llanish va yerlarning degradatsiyasi, harorat o'zgarishi bilan bog'liq muammolarga deyarli barcha xalqaro va mintaqaviy platformalarda oliy darajada e’tibor qaratib kelmoqda».
Xususan, o'tgan yil 28-noyabr 12-dekabr kunlari Dubayda bo'lib o'tgan BMTning Iqlim o'zgarishi bo'yicha hadli konvensiyasi (COP-28) tadbirlarida O'zbekiston Prezidenti boshchiligidagi mamlakat delegatsiyasi faol ishtirok etdi. Bu iqlim kun tartibining respublika uchun ulkan ahamiyati yana bir bor tasdiqladi.
Nashrda xabar qilinganidek, O'zbekiston Prezidenti Shavkat Mirziyoyev COP-28 asosiy anjumanida birinchilardan bo'lib so'zga chiqib, Markaziy Osiyo mintaqasidagi salbiy iqlim tendensiyalarini ta’kidlagan holda, global iqlim o'zgarishi oqibatlarini kamaytirish bir qator amaliy tashabbuslarni ham ilgari surdi.
«2017-yilda O'zbekiston Parij kelishuviga a’zo bo'ldi. Uni amalga oshirish uchun 2019-yilda 2019-2030-yillarga mo'ljallangan «yashil» iqtisodiyotga o'tish bo'yicha Strategiya ishlab chiqildi. Uning asosiy maqsadlaridan biri iqtisodiyotning energiya samaradorligini oshirish va tabiiy resurslardan oqilona foydalanish hisoblanadi. 2021-yilda issiqxona gazlari emissiyasini qisqartirish bo'yicha yangilangan milliy reja imzolandi. U 2030-yilga borib yalpi ichki mahsulot birligiga to'g'ri keladigan CO2 miqdorini 2010-yil darajasidan 35 foizga kamaytirishni nazarda tutadi», - deb ta’kidlangan nashrda.
«Sada al-Balad» AA qayd etganidek, O'zbekistonda qayta tiklanadigan energiya manbalarini rivojlantirish salohiyatidan faol foydalanmoqda. Agar 2021-yilda Navoiy shahrida Markaziy Osiyodagi eng yirik quyosh fotoelektr stansiyasi (QFS) birinchi bo'lib ishga tushirilgan bo'lsa, 2023-yil dekabr oyidayoq Samarqand, Jizzax, Surxondaryo, Buxoro va Qashqadaryo viloyatlarida beshta QFS, shuningdek, Navoiy viloyatidagi shamol elektr stansiyasi tarmoqqa ulandi.
Maqolada, shuningdek, ayni paytda Saudiya Arabistoni, BAA, Xitoy, Fransiya, Shveysariya kabi xorijiy kompaniyalar bilan hamkorlikda «yashil» stansiyalar va energiya saqlash tizimlarini qurish bo'yicha 12 ta loyiha ustida ish olib borilayotgani urg'ulangan. 2024-yilda quyosh elektr stansiyalarining umumiy quvvatini 2,6 gigavattga, shamol stansiyalarining umumiy quvvatini 900 megavattga oshirish, 400 megavatt quvvatga ega energiya saqlash qurilmalarini ishga tushirish rejalashtirilgan.
«Umuman olganda, O'zbekistonning iqlim bo'yicha kun tartibidagi sa’y-harakatlari mamlakat xalqaro munosabatlar subyekti sifatida global muammolarni hal etishda mas’uliyatni bo'lishishga tayyor ekanidan dalolat beradi», - deb yozilgan «Sada al-Balad» AA tomonidan tarqatilgan maqola xulosasida.
455
