Assalomu alaykum!
10-yanvar kuni isteʼmolchilarni energiya resurslari bilan barqaror taʼminlash boʻyicha amalga oshirilgan ishlar haqida maʼlumot beramiz.
Kecha elektr stansiyalar orqali jami 240 mln kVt·soat elektr energiyasi ishlab chiqarildi. Bu rejadagiga nisbatan 101 foiz koʻp deganidir. Buning uchun issiqlik elektr stansiyalarida 49,4 mln kubometr tabiiy gaz, 21 ming tonna koʻmir hamda 2,2 ming tonna mazut yoqildi.
Respublika elektr energiyasi isteʼmoli 226,5 mln kVt·soatni, tabiiy gaz isteʼmoli esa 152,9 mln kubometrni tashkil qildi.
Mamlakatimizdagi 1 ming 377 ta metan zapravka orqali isteʼmolchilarga 14,5 mln kubometr, belgilangan rejadagiga nisbatan 103 foiz koʻp tabiiy gaz sotildi. Avtomobillarga gaz quyish stansiyalari orqali 600 tonna suyultirilgan gaz yetkazildi.
Avtobenzin va dizel yonilgʻisi ham aholi va iqtisodiyot tarmoqlari ehtiyojini qoplaydigan darajada yetkazib berilmoqda. Xususan, kecha “Oʻzbekneftgaz” aksiyadorlik jamiyati tomonidan mamlakatimizdagi barcha avtomobillarga yonilgʻi quyish shoxobchalariga 3 ming 117 tonna avtobenzin yetkazib berildi.
Shuningdek, birja savdolariga avtomobillarga yonilgʻi quyish shoxobchalarida sotish uchun 3 ming 160 tonna avtobenzin,
1 ming 830 tonna dizel yonilgʻisi qoʻyilgan boʻlib, undan 2 ming 576 tonna avtobenzin hamda 162 tonna dizel yonilgʻisi sotildi
Vazirlik tizimidagi tashkilotlar korxonalarida qazib chiqarish va ishlab chiqarish ishlari ham oʻrnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik rejimi asosida ishlayapti.
Respublika hududlari boʻylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar tezkor bartaraf etib borilmoqda. Elektr va gaz taʼminoti korxonalarida tuzilgan maxsus brigadalar tunu kun ishlab, tarmoqlarda yuzaga kelayotgan nosozliklarni kechiktirmasdan taʼmirlamoqdalar.
Kecha mamlakatimiz boʻylab elektr qurilmalarida yuzaga kelgan 10 ta, gaz taʼminotida yuzaga kelgan 15 ta nosozlik bartaraf qilindi.
Elektr taʼminotidagi uzilishlar yuzasidan Energetika vazirligi tizim tashkilotlariga isteʼmolchilardan kelib tushgan 151 ta murojaat maxsus brigadalar tomonidan bartaraf etildi.
Tabiiy va suyultirilgan gaz taʼminoti boʻyicha kelib tushgan 194 ta murojaat boʻyicha ham tezkor chora-tadbirlar olib borildi.
Shu oʻrinda isteʼmolchilardan yana bir marta isitish moslamalariga ehtiyotkorlik bilan munosabatda boʻlishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qatʼiy rioya etishlarini iltimos qilib qolamiz.
Hurmatli isteʼmolchilar! Elektr energiyasi taʼminoti yuzasidan 1154 qisqa raqami yoki “Telegram”dagi @het_admin administratorga, gaz taʼminoti yuzasidan 1104, 104 telefon raqamlari yoki “Facebook” ijtimoiy tarmogʻidagi maxsus guruhga hamda koʻmir taʼminoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
Eʼtiboringiz uchun rahmat.
287
