Assalomu alaykum!
15-yanvar kuni iste’molchilarni energiya resurslari bilan barqaror ta’minlash bo‘yicha amalga oshirilgan ishlar haqida ma’lumot beramiz.
Kecha elektr stansiyalar orqali jami 251,7 mln kVt·soat, rejadagiga nisbatan 106 foiz ko‘p elektr energiyasi ishlab chiqarildi. Buning uchun issiqlik elektr stansiyalarida 47,5 mln kubometr tabiiy gaz, 24,3 ming tonna ko‘mir hamda 5,7 ming tonna mazut yoqildi.
Respublika iste’molchilariga 239,2 mln kVt·soat elektr energiyasi yetkazib berildi. Bu rejadagiga nisbatan 104 foiz ko‘pdir. Tabiiy gaz iste’moli 162,9 mln kubometrni tashkil qildi.
Mamlakatimizdagi 1 ming 370 ta metan zapravka orqali iste’molchilarga 14,4 mln kubometr, belgilangan rejadagiga nisbatan 103 foiz ko‘p tabiiy gaz sotildi. Avtomobillarga gaz quyish stansiyalari orqali 600 tonna suyultirilgan gaz yetkazildi.
Avtobenzin va dizel yonilg‘isi ham aholi va iqtisodiyot tarmoqlari ehtiyojini qoplaydigan darajada yetkazib berilmoqda. Xususan, kecha “O‘zbekneftgaz” aksiyadorlik jamiyati tomonidan mamlakatimizdagi barcha avtomobillarga yonilg‘i quyish shoxobchalariga 3 ming 264 tonna avtobenzin yetkazib berildi.
Shuningdek, birja savdolariga avtomobillarga yonilg‘i quyish shoxobchalarida sotish uchun 3 ming 455 tonna avtobenzin, 1 ming 842 tonna dizel yonilg‘isi qo‘yilgan bo‘lib, undan 2 ming 611 tonna avtobenzin hamda 190 tonna dizel yonilg‘isi sotildi
Vazirlik tizimidagi tashkilotlar korxonalarida qazib chiqarish va ishlab chiqarish ishlari ham o‘rnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik rejimi asosida ishlayapti.
Respublika hududlari bo‘ylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar tezkor bartaraf etib borilmoqda. Elektr va gaz ta’minoti korxonalarida tuzilgan maxsus brigadalar tunu kun ishlab, tarmoqlarda yuzaga kelayotgan nosozliklarni kechiktirmasdan ta’mirlamoqdalar.
Kecha mamlakatimiz bo‘ylab elektr qurilmalarida yuzaga kelgan 8 ta, gaz ta’minotida yuzaga kelgan 4 ta nosozlik bartaraf qilindi.
Xususan, kecha kuchli shamol aralash yoqqan qor tufayli soat 10:02 da Toshkent viloyatidagi “Adolat” podstansiyasida 110 kVli elektr uzatish tarmog‘i avariyaviy o‘chgan. Oqibatda Ohangaron tumani hamda Olmaliq shahridagi ayrim 5800 ta iste’molchi elektr ta’minotisiz qolgan. Soat 10:12 da ta’minotdan uzilgan barcha iste’molchilar boshqa liniyalarga o‘tkazilgan va elektr ta’minoti tiklangan. Soat 16:42 da nosozlik to‘liq bartaraf etilgach, me’yoriy sxema qayta tiklangan.
Shuningdek, soat 22:54 da Toshkent shahrida 110 kVli elektr uzatish tarmog‘i 23 MVt quvvat bilan avariyaviy o‘chgani tufayli Bektemir va Sergeli tumanlaridagi 4600 ta iste’molchi ma’lum muddat elektr ta’minotidan uzildi. Soat 00:45 da iste’molchilar ta’minoti to‘liq tiklandi.
Elektr ta’minotidagi uzilishlar yuzasidan Energetika vazirligi tizim tashkilotlariga iste’molchilardan 130 ta murojaat kelib tushdi va barchasi maxsus brigadalar tomonidan bartaraf etildi.
Tabiiy va suyultirilgan gaz ta’minoti bo‘yicha kelib tushgan 222 ta murojaat bo‘yicha ham tezkor chora-tadbirlar olib borildi.
Hurmatli iste’molchilar! Elektr energiyasi ta’minoti yuzasidan 1154 qisqa raqami yoki “Telegram”dagi @het_admin administratorga, gaz ta’minoti yuzasidan 1104, 104 telefon raqamlari yoki “Facebook” ijtimoiy tarmog‘idagi maxsus guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
E’tiboringiz uchun rahmat.
318
