Assalomu alaykum!
22-yanvar kuni isteʼmolchilarni energiya resurslari bilan barqaror taʼminlash boʻyicha amalga oshirilgan ishlar haqida maʼlumot beramiz.
Kecha elektr stansiyalar orqali jami 250,3 mln kVt·soat, rejadagiga nisbatan 6 foiz koʻp elektr energiyasi ishlab chiqarildi. Buning uchun issiqlik elektr stansiyalarida 44,7 mln kubometr tabiiy gaz, 20,6 ming tonna koʻmir hamda 11,3 ming tonna mazut yoqildi.
Respublika isteʼmolchilariga 237 mln kVt·soat, rejadagiga nisbatan 3 foiz koʻp elektr energiyasi yetkazib berildi. Tabiiy gaz isteʼmoli 151,5 mln kubometrni tashkil qildi.
Aholi va ijtimoiy soha obyektlarini birinchi navbatda tabiiy gaz bilan taʼminlash hamda quvurlardagi bosimni bir meʼyorda tutib turish maqsadida vodiy viloyatlarida metan zapravkalarga kiritilgan cheklovlar bosqichma-bosqich yumshatib borilmoqda. Mazkur hududlardagi metan zapravkalarning ish faoliyati mahalliy hokimliklar tomonidan tasdiqlangan reja-grafik asosida yoʻlga qoʻyilgan.
Kecha mamlakatimizdagi 1 ming 224 ta metan zapravka orqali isteʼmolchilarga 10,5 mln kubometr tabiiy gaz sotildi. Avtomobillarga gaz quyish stansiyalari orqali 700 tonna suyultirilgan gaz yetkazildi.
Avtobenzin va dizel yonilgʻisi aholi hamda iqtisodiyot tarmoqlari ehtiyojini qoplaydigan darajada yetkazib berilmoqda. Xususan, kecha “Oʻzbekneftgaz” aksiyadorlik jamiyati tomonidan avtomobillarga yonilgʻi quyish shoxobchalariga 2 ming 573 tonna avtobenzin yetkazib berildi.
Shuningdek, birja savdolariga avtomobillarga yonilgʻi quyish shoxobchalarida sotish uchun 3 ming 390 tonna avtobenzin, 2 ming 170 tonna dizel yonilgʻisi qoʻyilgan boʻlib, undan 2 ming 555 tonna avtobenzin hamda 274 tonna dizel yonilgʻisi sotildi.
Vazirlik tizimidagi tashkilotlar korxonalarida tuzilgan shtablar 24 soatlik navbatchilik rejimi asosida ishlayapti.
Respublika hududlari boʻylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar tezkor bartaraf etib borilmoqda. Elektr va gaz taʼminoti korxonalarida tuzilgan maxsus brigadalar tunu kun ishlab, tarmoqlarda yuzaga kelayotgan nosozliklarni kechiktirmasdan taʼmirlamoqdalar.
Kecha mamlakatimiz boʻylab elektr qurilmalarida yuzaga kelgan 8 ta, gaz taʼminotida yuzaga kelgan 9 ta nosozlik bartaraf qilindi.
Xususan, soat 07:20 da Surxondaryo viloyatidagi “Obodon” podstansiyasida transformatorning 5 MVt quvvat bilan avariyaviy oʻchishi tufayli Shoʻrchi tumanidagi 1 ming 300 ta isteʼmolchi elektr taʼminotidan uzilgan. Soat 11:28 da nosozlik toʻliq bartaraf qilinib, elektr taʼminoti qayta tiklangan.
Soat 16:40 da ayni viloyatdagi “L-Hazorbogʻ-2” elektr uzatish tarmogʻi 7 MVt quvvat bilan avariyaviy oʻchgan. Oqibatda Denov tumanida 2 ming 300 ta isteʼmolchi elektr taʼminotidan uzilgan. Soat 17:05 da tarmoq taʼmirlanib, isteʼmolchilarning elektr taʼminoti qayta tiklangan.
Elektr taʼminotidagi uzilishlar yuzasidan Energetika vazirligi tizim tashkilotlariga isteʼmolchilardan 119 ta murojaat kelib tushdi va barchasi maxsus brigadalar tomonidan bartaraf etildi.
Tabiiy va suyultirilgan gaz taʼminoti boʻyicha kelib tushgan 180 ta murojaat boʻyicha ham tezkor chora-tadbirlar olib borildi.
Shu oʻrinda isteʼmolchilardan yana bir marta isitish moslamalariga ehtiyotkorlik bilan munosabatda boʻlishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qatʼiy rioya etishlarini iltimos qilib qolamiz.
Hurmatli isteʼmolchilar! Elektr energiyasi taʼminoti yuzasidan 1154 qisqa raqami yoki “Telegram”dagi @het_admin administratorga, gaz taʼminoti yuzasidan 1104, 104 telefon raqamlari yoki “Facebook” ijtimoiy tarmogʻidagi maxsus guruhga hamda koʻmir taʼminoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
Eʼtiboringiz uchun rahmat.
267
