Assalomu alaykum!
24-yanvar kuni elektr stansiyalar orqali jami 249,7 mln kVt·soat, rejadagiga nisbatan 5 foiz koʻp elektr energiyasi ishlab chiqarildi. Buning uchun issiqlik elektr stansiyalarida 44,9 mln kubometr tabiiy gaz, 22,4 ming tonna koʻmir hamda 10,7 ming tonna mazut yoqildi.
Respublika isteʼmolchilariga 238,6 mln kVt·soat, rejadagiga nisbatan 4 foiz koʻp elektr energiyasi yetkazib berildi. Tabiiy gaz isteʼmoli 154,7 mln kubometrni tashkil qildi.
Aholi va ijtimoiy soha obyektlarini birinchi navbatda tabiiy gaz bilan taʼminlash hamda quvurlardagi bosimni bir meʼyorda tutib turish maqsadida vodiy viloyatlarida metan zapravkalarga kiritilgan cheklovlar bosqichma-bosqich yumshatib borilmoqda. Mazkur hududlardagi metan zapravkalarning ish faoliyati mahalliy hokimliklar tomonidan tasdiqlangan reja-grafik asosida yoʻlga qoʻyilgan.
Kecha mamlakatimizdagi 1 ming 345 ta metan zapravka orqali isteʼmolchilarga 12,3 mln kubometr tabiiy gaz sotildi. Avtomobillarga gaz quyish stansiyalari orqali 700 tonna suyultirilgan gaz yetkazildi.
Avtobenzin va dizel yonilgʻisi aholi hamda iqtisodiyot tarmoqlari ehtiyojini qoplaydigan darajada yetkazib berilmoqda. Xususan, 24-yanvar kuni “Oʻzbekneftgaz” aksiyadorlik jamiyati tomonidan avtomobillarga yonilgʻi quyish shoxobchalariga 2 ming 774 tonna avtobenzin yetkazib berildi.
Shuningdek, birja savdolariga avtomobillarga yonilgʻi quyish shoxobchalarida sotish uchun 3 ming 170 tonna avtobenzin, 2 ming 975 tonna dizel yonilgʻisi qoʻyilgan boʻlib, undan 2 ming 405 tonna avtobenzin hamda 271 tonna dizel yonilgʻisi sotildi.
Vazirlik tizimidagi tashkilotlar korxonalarida qazib chiqarish va ishlab chiqarish ishlari oʻrnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik asosida ishlayapti.
Respublika hududlari boʻylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar tezkor bartaraf etib borilmoqda.
Kecha mamlakatimiz boʻylab elektr qurilmalarida yuzaga kelgan 4 ta, gaz taʼminotida yuzaga kelgan 14 ta nosozlik bartaraf qilindi.
Xususan, bugun tungi soat 03:15 da Toshkent shahridagi 35 kVli “L-Xadra-2» elektr uzatish tarmogʻining “A” fazasida yer bilan qisqa tutashuv sodir boʻlayotganligi aniqlanib, 10 MVt quvvat bilan qoʻlda oʻchirilgan. Natijada Shayxontohur tumanidagi 2 mingta isteʼmolchi qisman elektr taʼminotidan uzilgan. Soat 04:05 da isteʼmolchilarning elektr taʼminoti boshqa tarmoq orqali taʼminlangan.
Shuningdek, kecha soat soat 09:00 da Surxondaryo viloyati, Shoʻrchi tumanidagi yuqori va oʻrta bosimli gaz quvurlarini taʼmirlash hamda yuqori bosimli gaz quvurlarini tartibga keltirish ishlarini olib borish maqsadida taʼmirlash maqsadida “Joyilma” mahalla fuqarolar yigʻini hududida 8 ming 118 ta aholi va 208 ta ulgurji isteʼmolchining tabiiy gaz taʼminoti vaqtincha toʻxtatilgan. Soat 16:10 da taʼmirlash ishlari yakuniga yetgach, isteʼmolchilarning tabiiy gaz taʼminoti ularni ogohlantirgan ravishda bosqichma-bosqich qayta tiklangan.
Taʼkidlash joizki, tarmoqlarda yuzaga kelishi mumkin boʻlgan nosozliklarni bartaraf etish maqsadida elektr va gaz taʼminoti korxonalarida tuzilgan 1 ming 691 ta maxsus brigada safida 7 ming 300 nafardan ortiq ishchi-xodimlar tunu kun ishlab, joylarda muammolarni tezkorlik bilan bartaraf etmoqdalar.
24-yanvar kuni elektr taʼminotidagi uzilishlar yuzasidan Energetika vazirligi tizim tashkilotlariga isteʼmolchilardan 219 ta murojaat kelib tushdi va barchasi maxsus brigadalar tomonidan bartaraf etildi.
Tabiiy va suyultirilgan gaz taʼminoti boʻyicha kelib tushgan 213 ta murojaat boʻyicha ham tezkor chora-tadbirlar olib borildi.
Shuningdek, kecha Energetika vazirligi huzuridagi “Oʻzenergoinspeksiya” tomonidan oʻtkazilgan nazorat tadbirlarida 48 ta isteʼmolchi tomonidan elektr energiyasi va tabiiy gazdan noqonuniy foydalanish holatlari aniqlandi. Energiya resurslaridan foydalanish qoidalarini buzish bilan bogʻliq huquqbuzarliklar boʻyicha 60 ta maʼmuriy ish rasmiylashtirildi.
Ishchi guruh tomonidan hududlarda 2 ming 492 ta profilaktik tadbir oʻtkazildi hamda 72 ta obyektda taʼminotchi korxonalar tomonidan amalga oshirilgan ishlar oʻrganildi.
Shu oʻrinda isteʼmolchilardan yana bir marta isitish moslamalariga ehtiyotkorlik bilan munosabatda boʻlishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilayotgan tavsiyalarga qatʼiy rioya etishlarini iltimos qilib qolamiz.
Hurmatli isteʼmolchilar! Elektr energiyasi taʼminoti yuzasidan 1154 qisqa raqami yoki “Telegram”dagi @het_admin administratorga, gaz taʼminoti yuzasidan 1104, 104 telefon raqamlari yoki “Facebook” ijtimoiy tarmogʻidagi maxsus guruhga hamda koʻmir taʼminoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
Eʼtiboringiz uchun rahmat.
267
