29-yanvar kuni elektr stansiyalar orqali jami 243,7 mln kVt·soat, rejadagiga nisbatan 3 foiz koʻp elektr energiyasi ishlab chiqarildi. Buning uchun issiqlik elektr stansiyalarida 42,9 mln kubometr tabiiy gaz, 24,7 ming tonna koʻmir hamda 10,1 ming tonna mazut yoqildi.
Respublika isteʼmolchilariga 230,6 mln kVt·soat elektr energiyasi yetkazib berildi. Tabiiy gaz isteʼmoli 157,3 mln kubometrni tashkil qildi.
Aholi va ijtimoiy soha obyektlarini birinchi navbatda tabiiy gaz bilan taʼminlash hamda quvurlardagi bosimni bir meʼyorda tutib turish maqsadida metan zapravkalarga kiritilgan cheklovlar bosqichma-bosqich yumshatib borilmoqda. Ularning ish faoliyati mahalliy hokimliklar tomonidan tasdiqlangan reja-grafik asosida yoʻlga qoʻyilgan.
Kecha mamlakatimizdagi 1 ming 325 ta metan zapravka orqali isteʼmolchilarga 11,8 mln kubometr tabiiy gaz sotildi. Avtomobillarga gaz quyish stansiyalari orqali 700 tonna suyultirilgan gaz yetkazildi.
Avtobenzin va dizel yonilgʻisi aholi hamda iqtisodiyot tarmoqlari ehtiyojini qoplaydigan darajada yetkazib berilmoqda. Xususan, 29-yanvar kuni “Oʻzbekneftgaz” aksiyadorlik jamiyati tomonidan avtomobillarga yonilgʻi quyish shoxobchalariga 3 ming 517 tonna avtobenzin yetkazib berildi.
Shuningdek, birja savdolariga avtomobillarga yoqilgʻi quyish shoxobchalarida sotish uchun 3 ming 730 tonna avtobenzin, 3 ming 809 tonna dizel yonilgʻisi qoʻyilgan boʻlib, undan 2 ming 767 tonna avtobenzin hamda 405 tonna dizel yonilgʻisi sotildi
Vazirlik tizimidagi tashkilotlar korxonalarida qazib chiqarish va ishlab chiqarish ishlari oʻrnatilgan tartibda olib borilmoqda. Barcha korxonalarda tuzilgan shtablar 24 soatlik navbatchilik rejimi asosida ishlayapti.
Respublika hududlari boʻylab qishning sovuq kunlarida isteʼmolning koʻpayishi tufayli elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar ham tezkor bartaraf etib borilmoqda.
Xususan, kecha mamlakatimiz boʻylab qattiq shamol va qor aralash yoqqan kuchli yomgʻir tufayli elektr qurilmalarida yuzaga kelgan 23 ta, gaz taʼminotida yuzaga kelgan 4 ta nosozlik bartaraf qilindi.
Jumladan, kecha Jizzax viloyatidagi 9 ming 867 ta isteʼmolchi, Surxondaryo viloyatidagi 15 mingta isteʼmolchi, Sirdaryo viloyatidagi 2 mingta isteʼmolchi, Samarqand viloyatidagi 39 ming 750 ta isteʼmolchi, Qashqadaryo viloyatidagi 16 ming 500 ta isteʼmolchi, Toshkent viloyatidagi 5 ming 840 ta isteʼmolchi, Buxoro viloyatidagi 3 ming 800 ta isteʼmolchi, Andijon viloyatidagi 8 mingta isteʼmolchi, Fargʻona viloyatidagi 5 mingta isteʼmolchi va Toshkent shahridagi 3 ming 275 ta isteʼmolchilar kunning turli vaqtlari davomida elektr taʼminotidan uzilgan.
Ushbu nosozliklar noqulay ob-havo sharoitiga qaramay, maxsus tezkor brigadalar tarafidan nosozlikning koʻlamiga qarab 13 daqiqadan to 8 soatu 24 daqiqagacha boʻlgan vaqt oraligʻida tuzatilib, isteʼmolchilar qayta tarmoqqa ulangan.
Taʼkidlash joizki, qishning sovuq kunlarida tarmoqlarda yuzaga kelishi mumkin boʻlgan nosozliklarni tezkor bartaraf etish maqsadida elektr va gaz taʼminoti korxonalarida tuzilgan 1 ming 691 ta maxsus brigada safida 7 ming 300 nafardan ortiq ishchi-xodimlar tunu kun ishlab, joylarda muammolarni zudlik bilan bartaraf etmoqdalar.
29-yanvar kuni elektr taʼminotidagi uzilishlar yuzasidan Energetika vazirligi tizim tashkilotlariga isteʼmolchilardan 241 ta murojaat kelib tushdi va barchasi maxsus brigadalar tomonidan bartaraf etildi.
Tabiiy va suyultirilgan gaz taʼminoti boʻyicha kelib tushgan 232 ta murojaat boʻyicha ham tegishli tartibda tezkor chora-tadbirlar koʻrildi.
Hurmatli isteʼmolchilar! Elektr energiyasi taʼminoti yuzasidan 1154 qisqa raqami, 71-207-23-76 telefon raqami yoki “Telegram”dagi @het_admin administratorga, gaz taʼminoti yuzasidan 1104, 104 qisqa raqamlari, 71-202-11-04 telefon raqami yoki “Feysbuk” ijtimoiy tarmogʻidagi maxsus guruhga hamda koʻmir taʼminoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
327
