Bugun jurnalist va blogerlar Xitoyning podstansiya, transformator va boshqa elektr uskunalarini ishlab chiqaruvchi “China electric equipment group” (CHINA XD) kompaniyasi faoliyati bilan tanishishdi.
“CHINA XD” kompaniyasi 1955-yilda tashkil topgan bo‘lib, unda jami 11 ming nafardan ziyod ishchi-xodimlar faoliyat yuritadi. Bugungi kunda kompaniya 100 dan ortiq davlatlarda o‘z loyihalari bilan ishtirok etib kelmoqda.
Bu yerda eng kichik hajmlidan tortib, dunyodagi eng katta quvvatli elektr qurilmalar — podstansiyalar, kuch transformatorlari, izolyatorlar, o‘chirgichlar va boshqa shu kabi qurilmalar ishlab chiqariladi.
Ishlab chiqarish jarayonida mahsulotlar tayyor holga keltiriladi hamda ular sotuvga chiqarilishidan oldin maxsus laboratoriyalarda sinov nazoratidan o‘tkaziladi.
Press-turda jurnalistlar va blogerlar mazkur jarayonni kuzatish imkoniga ega bo‘lishdi.
Aytish kerakki, ushbu kompaniya bilan O‘zbekistonda ham bir nechta yirik loyihalar amalga oshirilmoqda.
Xususan, respublika hududi bo‘ylab 100 ta podstansiya qurish va modernizatsiya qilish hamda 110, 220 va 500 kV kuchlanishli elektr uzatish tarmoqlarini bunyod etish loyihasi olib borilmoqda.
Shuningdek, “mis” klasterida elektr texnika uskunalarini ishlab chiqarishni yo‘lga qo‘yish bo‘yicha hamkorlik qilinyapti.
Ma’lumot uchun: 2023-yilning avgust oyida mazkur loyihalarni amalga oshirish bo‘yicha Anglashuv memorandumi imzolangan.
218
