Bugun ommaviy axborot vositalari vakillari, jurnalistlar va blogerlar “LONGi” kompaniyasining Sian shahrida joylashgan bosh ofisida ham bo‘lishdi.
U yerda kompaniya faoliyati bilan yaqindan tanishildi.
Asosan, quyosh panellarini ishlab chiqarish bilan shug‘ullanuvchi mazkur yirik kompaniya 2000-yilda tashkil topgan. 2022-yilda kompaniyaning operasion daromadi salkam 18,6 mlrd dollarni tashkil etgan.
Kompaniya Xitoy, Vyetnam va Malayziya kabi mamlakatlarda ishlab chiqarish bazalari hamda AQSH, Yaponiya, Germaniya, Hindiston, Avstraliya, BAA, Tailand va boshqa davlatlardagi filiallari bilan dunyoning 150 dan ortiq mamlakat hamda mintaqasida faoliyat yuritib keladi.
“LONGi” quyosh panellari bozorida yirik kompaniya sifatida eng kuchli brendlar qatoriga kiradi va u ketma-ket uch yil davomida quyosh modullarini katta hajmda yetkazib berish bilan yetakchilik qilib keladi.
Mazkur kompaniya O‘zbekistonda ham bir qator “yashil” energetika loyihalarida qatnashib kelmoqda.
Misol uchun, Xitoyning “China Gezhouba Group” kompaniyasi tomonidan Nishon va Qorovulbozor tumanlarida barpo etilayotgan, har birining quvvati 500 MVtdan bo‘lgan yirik quvvatli quyosh fotoelektr stansiyalari uchun quyosh panellarini yetkazib bermoqda.
Ahamiyatlisi, 2023-yil 27-dekabr kuni ushbu ikkita fotoelektr stansiyasining dastlabki quvvatlari umumiy energetika tarmog‘iga ulandi (https://t.me/minenergy_uz/10102) hamda hozirgi kunga qadar iste’molchilarga ekologik toza, “yashil”energiya yetkazib bermoqda.
271
