Bugun, 3-fevral kuni O‘zbekiston ommaviy axborot vositalari vakillari, jurnalistlar va blogerlar Xitoyning Chendu shahrida joylashgan “Dongfang Electric Corporation” kompaniyasi (Dongfang) faoliyati bilan yaqindan tanishishdi.
Press-turda ularga ushbu yirik elektr energetika kompaniyasi issiqlik elektr stansiyalari, shamol elektr stansiyalari, quyosh fotoelektr stansiyalari, gidroelektr stansiyalari, atom elektr stansiyalari uchun eng zamonaviy energoqurilmalar ishlab chiqarish va ularni o‘rnatish bilan shug‘ullanishi haqidagi ma’lumotlarni multimedia mahsulotlari yordamida qiziqarli qilib yetkazishdi.
1958-yilda dastlab “Dongfang Electric Machinery Plant” (Dongfang elektr mashinasozlik zavodi) tashkil etilgan.
“Dongfang Electric Corporation” esa 1984-yilda tashkil qilingan bo‘lib, u hozirgi kunda dunyoning 20 dan ziyod davlatlariga energoqurilmalarini eksport qilishi hamda o‘zining megaloyihalari bilan ishtirok etishi aytib o‘tildi.
Kompaniya O‘zbekistonda ham “yashil” energetika loyihalarida qatnashib kelayotganligi alohida ta’kidlandi.
Xususan, Samarqand viloyatining Kattaqo‘rg‘on va Jizzax viloyatining Gʻallaorol tumanlarida BAAning “Masdar” kompaniyasi tomonidan barpo etilayotgan, har birining quvvati 220 MVtdan bo‘lgan ikkita quyosh fotoelektr stansiyasi qurilishida bosh pudratchi sifatida qatnashyapti.
Ahamiyatlisi, 2023-yilning 27-dekabr kuni ushbu ikkita fotoelektr stansiyasining dastlabki quvvatlari O‘zbekistonning umumiy energetika tarmog‘iga ulangan edi.
Mazkur ikkita fotoelektr stansiyasining qurilishi davrida 1 ming 600 nafargacha va ishga tushgandan so‘ng yana 100 nafar yangi ish o‘rni yaratiladi.
335
