Energetika vazirligi huzuridagi “Oʻzenergoinspeksiya” tomonidan Bosh prokuratura, IIV hamda gaz taʼminoti korxonalari mutaxassislari bilan hamkorlikda Sirdaryo viloyatida oʻtkazilgan nazorat tadbirlarida tabiiy gazdan noqonuniy foydalanish holatlari aniqlandi.
Xususan, Guliston tumanida istiqomat qiluvchi fuqaro Y.P. xonadonida yashirin tarzda bodroq sexi tashkil qilib, tabiiy gazdan noqonuniy foydalanishi natijasida davlat manfaatlariga 339 million 143 ming soʻmlik zarar yetkazilganligi maʼlum boʻldi.
Yangiyer shahrida esa “K.A.T.” MCHJga qarashli oshxona (231 million 140 ming soʻm) hamda “N.S.Z.S.” yakka tartibdagi tadbirkorlik subyektiga qarashli novvoyxona (61 million 860 ming) gaz quvuriga texnik ish rejimini buzishga olib keladigan qurilmalar (yaʼni soʻruvchi nasos) oʻrnatib, gaz tarmogʻiga ulanganligi natijasida davlat manfaatlariga jami 293 million soʻmlik zarar yetkazilganligi aniqlandi.
Qoidabuzar isteʼmolchilarga nisbatan belgilangan tartibda choralar koʻrish uchun tegishli hujjatlar rasmiylashtirilib, huquqni muhofaza etuvchi organlarga taqdim qilindi.
Hududlarda nazorat tadbirlari davom etmoqda.
201
