Assalomu alaykum!
Kecha, 17-fevral hamda bugun, 18-fevral kunlari mobaynida iste’molchilarni energiya resurslari bilan ta’minlash bo‘yicha amalga oshirilgan ishlar, avtomobillarga gaz to‘ldirish kompressor shoxobchalaridagi mavjud vaziyat haqida ma’lumot beramiz.
Avval xabar qilganimizdek, kecha soat 17 dan 50 daqiqa o‘tganida Buxoro viloyatida yuz bergan kuchli shamol tufayli 110 kV kuchlanishga ega “L-Gazli-2” hamda soat 18 dan 3 daqiqa o‘tganida “L-Gazli-1” elektr uzatish tarmoqlari 31 megavatt quvvat bilan avariyaviy o‘chgan.
Oqibatda “Gazli” kompressor stansiyasidagi 8 ta hamda “Gazli” gazni qayta ishlash zavodiga qarashli “Uchqir” kompressor stansiyasidagi 2 ta gaz haydash agregati avariyaviy to‘xtagan.
18-fevral kuni soat 7 dan 12 daqiqa o‘tganida Gazli neft va gaz qazib chiqarish boshqarmasi obyektlarida elektr ta’minoti zaxiradagi 110 kV kuchlanishli “Uchqir – Gazli” tarmog‘i orqali tiklanib, agregatlarni qayta ishga tushirish choralari boshlangan.
Shu vaqt oralig‘ida respublikaning janubiy qismiga yo‘naltiriladigan tabiiy gaz hajmi me’yoriy sxemadagidan qisqarishi, shuningdek, magistral gaz quvurlarida bosimning nisbatan pasayishi holati yuzaga kelgan.
Gaz bosimining kamayishini inobatga olgan holda, birinchi navbatda, aholi xonadonlari va ijtimoiy soha obyektlarini tabiiy gaz bilan ta’minlash maqsadida mamlakatimizdagi barcha avtomobillarga gaz to‘ldirish kompressor shoxobchalari faoliyati vaqtinchalik to‘xtatildi.
Shuningdek, bir qator issiqlik elektr stansiyalarida gaz bosimining pasayishi holati kuzatilishi tufayli respublikamizning ba’zi bir hududlarida yagona energetika tizimi barqaror ishlashini ta’minlash maqsadida elektr energiyasi ta’minotida qisqa muddatli cheklovlar o‘rnatildi.
Ayni paytda mamlakatimiz bo‘ylab elektr ta’minotida 220 megavatt cheklov kiritilgan.
Magistral gaz quvurlarida gaz bosimining keskin tushib ketishi mumkinligini inobatga olib, respublika iste’molchilari hamda issiqlik elektr stansiyalarini tabiiy gaz bilan bir maromda ta’minlashda yuzaga kelishi mumkin bo‘lgan salbiy holatlarni bartaraf etish maqsadida yana boshqa zarur choralar ham ko‘rilmoqda.
Hozirgi vaqtda 110 kVli “L-Gazli-1” hamda “L-Gazli-2” elektr uzatish tarmoqlarida ta’mirlash ishlari olib borilyapti. Gaz haydash agregatlari faoliyatini bosqichma-bosqich yo‘lga qo‘yish ustida ishlanmoqda.
Shuningdek, bugun kuchli shamol tufayli Samarqand, Buxoro va Jizzax viloyatlarining ayrim hududlarida elektr ta’minotida qisqa muddatli uzilishlar kuzatildi.
Hududiy elektr ta’minoti korxonalarining maxsus brigadalari tomonidan olib borilgan tezkor ta’mirlash-tiklash ishlari tufayli ayni paytgacha Samarqand va Jizzax viloyatlarida elektr ta’minotidan uzilgan iste’molchilar tarmoqqa qayta ulandi.
Soat 15:00 holatiga Buxoro viloyatining Romitan, Buxoro, Olot, Kogon hamda Jondor tumanlarida 15 mingta iste’molchi elektr ta’minotisiz qolmoqda.
Hozirgi vaqtda maxsus brigadalar tomonidan mazkur nosozlikni ham tezkor bartaraf etish choralari amalga oshirilyapti.
Ta’kidlash joizki, qishning sovuq kunlarida tarmoqlarda yuzaga kelishi mumkin bo‘lgan nosozliklarni tezkor bartaraf etish maqsadida elektr va gaz ta’minoti korxonalarida tuzilgan 1 ming 691 ta maxsus brigada safida mehnat qilayotgan 7 ming 300 nafardan ortiq ishchi-xodimlar tunu kun ishlab, joylarda muammolarni zudlik bilan bartaraf etmoqdalar.
Hurmatli iste’molchilar! Elektr energiyasi ta’minoti yuzasidan 1154 qisqa raqami, 71-207-23-76 telefon raqami yoki “Telegram”dagi @het_admin administratorga, gaz ta’minoti yuzasidan 1104, 104 qisqa raqamlari, 71-202-11-04 telefon raqami yoki “Facebook” ijtimoiy tarmog‘idagi maxsus guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
E’tiboringiz uchun rahmat.
381
