ЎзА сайтида “Ўзтрансгаз” мутасаддилари диққатига: газ лимит бўйича бериладими ёки эҳтиёжга қарабми?”, “Самарқанддаги метан заправкаларида яна турнақатор навбат” сарлавҳали мақолалар шунингдек, ижтимоий тармоқларда Фарғона вилоятидаги АГТКШларда яна навбатлар юзага келаётгани ҳақида хабар эълон қилинди. Мақолаларда Самарқанд шаҳрида кейинги кунларда газ босмининг пасайиб кетгани, “Ҳудудгаз Самарқанд” МЧЖ Самарқанд шаҳар филиали раҳбарининг – Самарқанд ўз эҳтиёжига нисбатан 50 %дан ҳам кам газ олаётгани ҳақидаги фикри ва метан заправкаларда қатор навбатлар пайдо бўлганига оид ҳолатлар келтирилган.
Уларда келтирилган муаммоларга муносабат сифатида мавжуд қонуний асослар, мутахассислар фикри ва таҳлилий маълумотларга таянган ҳолда айтиш мумкинки:
Амалдаги меъёрий хужжатларга кўра, ҳар бир йил учун белгиланадиган табиий газ ҳажмлари истеъмолчиларнинг буюртмалари асосида шакллантирилиб, тегишли вазирлик ҳамда идоралар билан келишилган ҳолда Иқтисодиёт ва саноат вазирлиги томонидан тасдиқланади. Белгиланган миқдорлар “Ўзтрансгаз” Акциядорлик жамияти томонидан етказиб берилади.
Аҳоли истеъмолчиларининг табиий газ истеъмоли ва тўлови ҳисоби юритиладиган “Биллинг газ” дастуридан олинган маълумотга кўра, 2019 йилда Самарқанд вилоятидаги мавжуд 281 502 та аҳоли истеъмолчиларига 763,8 млн. куб метр (ҳар бирига ўртача 3 014 куб.м дан, режага нисбатан 111,1 %) табиий газ етказиб берилган.
Бугунги кунда, аҳоли, стратегик ва ижтимоий аҳамиятга эга бўлган истеъмолчиларни табиий газ билан узлуксиз таъминлаш, куз-қиш даврида табиий газ етказиб берилиши кафолатланмаган истеъмолчиларни газ тармоғидан ажратилганлигини ўрганиш мақсадида Энергетика вазирлиги ва “Ўзтрансгаз” АЖнинг ишчи гуруҳлари вилоятларда фаолият олиб бормоқда. Самарқанд вилоятида ўтказилган ўрганишларда ҳудудий газ таъминоти корхоналари томонидан газ тармоғидан ажратилган кафолатланмаган истеъмолчиларнинг ноқонуний тарзда газ тармоғига қайта уланганлик ҳолатлари аниқланмоқда.
Жорий йилнинг 3 январидан 20 январига қадар “Ўзнефтгазинспекция” томонидан республикамиз ҳудудларида ўтказилган ўрганишлар доирасида 5,1 млрд. сўмлик газни талон-тарож қилиш ҳолатлари аниқланди. Бундай истеъмолчиларга белгиланган тартибда табиий газ ҳажмлари қайта ҳисоб-китоб қилиниб, қонуний чоралар кўриш учун ҳуқуқни муҳофаза қилиш органларига ҳужжатлар тақдим этилмоқда.
Мақолада - Вилоят ва шаҳар ҳокимликлари, ”Ҳудудгаз Самарқанд” МЧЖ томонидан эскириб қолган тармоқ ва иншоатларни янгилаш учун ўтган йили 76 миллиард сўм ажратилди, деган маълумот келтирилган. Тўғри, Самарқанд шаҳри ва унинг атрофида йўлларни реконструкциялаш ишлари олиб борилди. Бу ишлар билан бир пайтда ўша ҳудудда “Ўзтрансгаз” АЖ томонидан ҳам газ тармоқлари реконструкция қилинди. Хусусан, 60 км ҳажмда турли диаметрдаги газ қувурлар кўчирилиб, янгиланди. Шу ишлар учун 2019 йилда “Ўзтрансгаз” АЖ ҳисобидан қарийб 42,5 млрд сўм маблағ йўналтирилди.
Маълумки, мамлакатимизда электр энергиянинг асосий қисми иссиқлик электр станциялари томонидан табиий газни ёқиш эвазига ишлаб чиқарилади. Табиий газ биринчи навбатда аҳоли эҳтиёжи, иссиқлик ва электр энергияси ишлаб чиқарувчи корхоналар ҳамда ижтимоий соҳа объектлари учун етказиб берилади. Мамлакатимиздаги янги қурилишлар ва истеъмолчилар сонининг ортаётгани сабабли табиий газга бўлган эҳтиёж муттасил ошмоқда.
Шулардан келиб чиққан ҳолда юртимиздаги автотранспорт эгалари ҳаво совиб кетган вақтларда юқорида келтирилган сабабларни инобатга оладилар ва вужудга келган вазиятга тушунган ҳолда муносабатда бўладилар деган умиддамиз.
Юзага келаётган ноқулайликлар учун истеъмолчилардан узр сўраймиз.
“Ўзтрансгаз” АЖ Матбуот хизмати
692
