2020 йил 17 январда Ўзбекистон Республикаси Энергетика вазирлиги ҳузуридаги Атом энергетикасини ривожлантириш агентлигида («Ўзатом» агентлиги) Франциянинг Ўзбекистон Республикасидаги Фавқулодда ва Мухтор элчиси Изабель Сервоз-Галлуччи раҳбарлигидаги Франция элчихонаси делегацияси ва Россия Федерациясидаги Франция элчихонасининг Атом энергияси бўйича минтақавий маслаҳатчиси ҳамда Ўзбекистондаги вакили Александр Горбачев билан Франция Республикаси элчихонаси делегацияси билан учрашув бўлиб ўтди.
Учрашувда Франция томони «Атом энергиясидан тинч мақсадда фойдаланиш тўғрисида»ги Ўзбекистон Республикаси қонунининг қабул қилинганини ижобий баҳолади. Таъкидландики, аҳолининг хавфсизлигини таъминлаш ва жамоатчилик назорати шаффофлигини оширишга алоҳида эътибор қаратилган ушбу қонун барча халқаро меъёрларга тўла мос келади.
Мулоқот чоғида Ўзбекистон делегациясининг Францияга ташрифи давомида эришилган икки томонлама келишувлар, шунингдек француз компаниялари билан ҳамкорлик алоқаларини ривожлантириш масалалари муҳокама қилинди.
Шунинг билан бирга, мамлакатимизда Ўзбекистон Республикаси Геология ва минерал ресурслар давлат қўмитаси иштирокида Франциянинг “Orano Mining S.A.” компанияси билан уран қидириш ва қазиш бўйича қўшма корхона таъсис этилгани, “Assystem” компанияси билан ҳамкорликда барча турдаги электр тармоқлари ва энергетика объектларини инновацион технологиялар қўлланган ҳолда лойиҳалаштиришга ихтисослашган «Uzenergoengineering–Assystem» қўшма корхонаси ташкил этилгани қайд этилди.
Икки томонлама ҳамкорликни ривожлантириш доирасида Ўзбекистон томони нергетик соҳа бўйича ускуналар ишлаб чиқариш бўйича Франциянинг йирик компаниялари билан қалин алоқалар ўрнатиш ва уларни бу ишга жалб этиб, уларни саноат кооперацияси йўли билан ишлаб чиқаришни маҳаллийлаштиришни жадаллаштириш таклифини билдирди. Бундан ташқари, учрашувда Ўзбекистон Республикаси делегациясининг 2020 йил 21-24 январь кунлари Парижга ташрифи давомида Франциянинг атом соҳаси бўйича маҳсулотлари тақдимотини ўтказиш таклиф қилинди.
Учрашувда шунингдек, кадрлар тайёрлаш соҳасидаги ҳамкорлик, атом энергетикаси соҳасидаги мутахассисларнинг профессионал салоҳияти, атом энергетикасидан фойдаланиш соҳаси бўйича асосий халқаро ҳужжатларни ратификация қилиш каби Ўзбекистондаги мавжуд қонунчилик асослари ва меъёри ҳолатларга доир масалалар кўриб чиқилди.
1255
